La Xunta d’Escritores falará del asturianu de Cantabria

|

La situación del asturianu na vecina Cantabria va ser una de les materies que tratará la Xunta d’Escritores Asturianos. Na conferencia de Xaviel Vilareyo, “La llingua d'Asturias de Santiyana”, ponencia que tendrá llugar el día 11 de xineru a les 18,30 nel Palaciu Villa Madalena d'Uviéu, analizaráse la vitalidá del asturianu oriental.

Según indiquen dende la Xunta al traviés d’una nota de prensa; “L'idioma asturianu ye la llingua propia y tradicional d'Asturias de Santiyana, un territoriu históricu asturianu qu'algama les llendes de los ríos Deva y Miera. El mesmu idioma, na so variante oriental, dase tamién nel territoriu de La Llébana y na Asturies d'Uviéu na rexón al oeste del ríu Seya. Toos estos territorios xunto colos conceyos asturianos de Sayambre y Valdeón conformen el territoriu dialeutal del asturianu oriental”.
 
Del mesmu mou escarien que fuera d'estes llendes idiomátiques tamién esisten elementos llingüísticos asturianos, “como na Asturias de Tresmiera, nel norte de Palencia y notros territorios al sur del cordal como Campoo, anque nestes zones los elementos llingüísticos asturianos són yá más bien escasos ”.
 
Xaviel Vilareyo (Mieres del Camín, 1967) ye llicenciáu en drechu y profesor de pianu tituláu pol Conservatoriu d'Uviéu. Recibió los premios de lliteratura Vila de Sarria, Xeira, Valentín Andrés, Elvira Castañón, Premiu de Teatru de l'Academia, amás de Mención especial nel Premiu Asturies d'ensayu. Pertenez a la tercer xeneración d'escritores del Surdimientu asturianu con delles obres yá publicaes.

Comentarios

Contador Estadistiques