El Conseyu de la Mocedá d'Uviéu usará software llibre n'asturianu

El Comité Executivu del Conseyu de la Mocedá d’Uviéu aprobó instalar software llibre n'asturianu nes sos dependencies. La propuesta de resolución foi presentada pola organización de mocedá Fai! y va conllevar la conversión de tolos equipos del Conseyu a software llibre non privativu n'asturianu. Amás, la resolución instaba a que'l presidente del CMU solicitare al Ayuntamientu, el desaniciu del software privativu de toles dependencies públiques y d'alministración d'Uviéu.

Fai! presentó d'urxencia una propuesta de resolución nel últimu Comité Executivu celebráu'l día 30 d'avientu, na que se desplicaba la diferencia ente software llibre y privativu y s'afalaben les virtúes de los sistemes basaos en GNU/Linux, como ye'l casu d'Ubuntu, qu'amás ta tornáu dafechu al asturianu, coles grafíes propies de la llingua como Ḷḷ y Ḥ. Arriendes de la so aprobación, tolos equipos del Conseyu van tornase al sistema operativu llibre "Ubuntu".

Al tiempu, Fai! pidía na so propuesta que dende'l propiu Conseyu se punxeren en contautu cola comunidá asturiana de software llibre, Softastur, pa sondear la posibilidá de facer dalgún taller d'instalación en collaboración n'espacios públicos d'Uviéu, asina como pa que'l presidente del CMU solicitare a les instancies afayadices del Ayuntamientu la integración del software llibre nos equipos del conceyu d'Uviéu, lo mesmo nos d'accesu públicu como nos de tipu alministrativu.

Fai! anunció que va siguir treslladando esti mesmu discursu a les instancies del restu de Conseyos de la Mocedá d'Asturies pa que'l software non privativu dexe de ser realidá nes alministraciones públiques asturianes. Un software que según la organización “fai lo mesmo, n'asturianu, meyor, d'accesu global y democráticu y que nun beneficia a les grandes empreses que monopolicen el sector y arriquecen les sos fortunes a costa de les llicencies pagaes polos organismos públicos”.