La TPA faise colos drechos de la Primera División no que queda de temporada

La televisión pública asturiana (TPA) va emitir tolos sábados, a les diez de la nueche, un partíu de la lliga española de Primera División tres algamar un alcuerdu cola canal estatal La Sexta. El primer partíu va emitise’l sábadu dos de xineru y nél, Héctor Alonso encargaráse de narrar l’alcuentru ente l’Atlético de Madrid y el Sevilla dende l’estadiu Vicente Calderón.

El redactor y presentador de deportes de la TPA tará acompañáu nesti primer partíu del ex xugador del Sporting y del Sevilla, Mino, amás del ex uvieista y ex xugador del Atlético, Armando. Enantes del partíu, la canal pública emitirá a les 21.30 hores el previu al alcuentru, onde van cobrar protagonismu los xugadores asturianos que xueguen en Primera.
 
Estos partíos de la lliga española completen la ufierta futbolística de la TPA xunto a Champions League y los partíos del Real Uviéu. La TPA fairá la trasmisión en castellán, mientres qu’en canales como TVG, ETB o la catalana TV3, la emisión na llingua propia convirtióse nun de los pegollos fundamentales de la promoción del idioma al traviés de la televisión.