Llibertá d'espresión y cibercloaques

Dende hai yá unos años la mio persona ye la más recurrente a la hora de que los «foroadictos» la entamen con daquién. Vengo soportando estoicamente toa clas d’insultos, llevantos, belurdies y vexaciones cibernétiques. De ralo en ralo, siempre aparecen los mesmos, qu’aprovechen cualquier asuntu o noticia rellacionada conmigo o con Dixebra p’aventar les sos verdaes a medies, los sos tracamundios, la so versión interesada y sesgada, o directamente les sos mentires y difamaciones. Ensin pruebes, ensin argumentos, ensin nada no que se sofitar, táchenme de vendíu, traidor, falsu, combayón, hipócrita, peseteru, mafiosu, corruptu… y demás axetivos, nuna especie de carrera del desprestixu onde’l que suelte la barbaridá más grande gana. La mayoría d’elles son atentaos contra la dignidá, l’honor y la imaxe personal y, mesmamente, dalgunes constitutives de delitu. En tou esti tiempu nun quixi rebaxame al nivel de los que tán detrás de too ello, por una razón bien cenciella: nun sé quién son (anque puedo albidralo) y nun me parez que daquién que s’escuende detrás d’un anónimu mereza la consideración de naide. Pero pola fartura y la indefensión que too ello me produz fáigolo agora la primera y la última vez. Y fáigolo como siempre fixi: dando la cara y firmando lo que digo y escribo, y aprovechando de pasu p’asoleyar delles reflexones que tou esti asuntu me xeneró.

La mio condición de personaxe públicu dientro del asturianismu supón una serie de «penitencies» que son, podíemos dicir, inherentes a esa situación. El desenvolver una xera pública dientro de la sociedá, nel mio casu, fundamentalmente, la música, lleva implícito que teas espuestu a les crítiques y a la valoración abierta d’esi trabayu. Pa entendenos, si a daquién nun-y gusta l’últimu discu de Dixebra nun me queda otro qu’asumilo y aguantame; pero d’ehí a la campaña de desprestixu permanente hai muncho. Llevo más de la metá de la mio vida metíu nesta historia del asturianismu, nacionalismu, reconstrucción nacional d’Asturies, o llamáilo como queráis, y siempre lo fixi a cara descubierta, pa lo bono y pa lo malo, coles mios contradicciones (que les tengo, y munches) y colos mios errores (abondos) y aciertos (dalgunos). Nun quiero qu’esto suene a xustificación nenguna (nada más lloñe de la mio intención): asumo dafechu la mio trayectoria, que, por cierto, deben desconocer toos esos cibercobardes que s’escuenden embaxo un númberu o un nomatu. Y nun ye que refugue les crítiques o que nun me guste que m’echen en cara coses que fixi mal: ensin dir más lloñe, lo del tan cacarexáu discu de música asturiana que’l Gobiernu d’Asturies regaló a los emigrantes asturianos pela Navidá d’hai unos años (nel que nun tuvi absolutamente nada que ver porque yera un trabayu encargáu muncho enantes de la fusión de L’Aguañaz y Ámbitu) y que la casualidá quixo que tuviera nel estudiu de grabación onde se fixo’l máster y accediera a poner la voz que dicía, testualmente: «Esta locución fue grabada por el Presidente del Principado de Asturias, Vicente Álvarez Areces, en diciembre del año 2006». Foi un gran error, pol que me cayó perriba y perbaxo, y na que dalguna xente personalmente vieno a dicime que nun-y prestara que fora yo precisamente’l que dixera la frase de marres. Probablemente espérase d’ún que sía exemplu y espeyu de lo meyor del asturianismu, pero nun cuenten con qu’esi ún ta fechu tamién de la mesma materia imperfecto qu’ellos: humanidá. Otra manera, el que piense que por lleer esa frase voi arrenunciar a los mios posicionamientos y ideoloxía cenciellamente ye fatu (probái a dicila n’alto y yá veréis cómo nun pasa nada: depués d’eso va siguir gustándovos la fabada, vais siguir siendo del Sporting o del Uviéu y van siguir atrayéndovos sexualmente les moces o los mozos). Foi un error, dígolo públicamente, nun cayí na cuenta de lo que, según me dixeron delles persones y amigos, yo (vamos dexanos de falses modesties) podía representar nel asturianismu. Otra manera, lo único punible del discu ye’l bon o mal gustu d’Areces al incluír un discursu institucional nél.

Esti asuntu quiciabes abriera la caxa de los truenos contra min. Depués d’eso vinieron acusaciones tan pelegrines como la de ser «el neñu mimáu de la FSA», escaeciendo que fui l’únicu que s’atrevió a dicir que’l so tratamientu de los asturfalantes sofitábase nel mesmu entramáu ideolóxicu que’l de los nazis, nun artículu tituláu Federación nazional-Socialista Asturiana, que pudo costame una querella. Tamién salió’l supuestu viaxe a tutiplén a Laponia «pagáu por Areces», cuando la realidá ye que la organización del Liet-Lavlut selecccionónos personalmente y asumía tolos gastos, pero quiximos involucrar a l’alministración autonómica pa que nos años posteriores pudieren siguir diendo a esi festival más artistes asturianos, como asina sucedió depués. Échenme en cara que trabayo nos medios de comunicación públicos del país (probablemente ensin saber qu’enantes yá lo fixera en La Voz de Avilés, Radio Asturias, Radio Popular de Avilés, Radio Marea y Radio Sele –onde tuvi munchos años y pa la que toquemos de baldre siempre que lo necesitó–), como si eso fora yá l’acabóse, cuando soi de la opinión de que los que tamos pol asturianu tenemos que demostrar a la sociedá que somos quien a facelo bien y con xeitu, mostranos tan o más profesionales que los qu’utilicen el castellanu y qu’hai qu’aprovechar cualquier requexu nos medios de titularidá pública pa visibilizanos y llegar al común del país. Amás, según esto, un nacionalista enxamás podría trabayar pal «estáu opresor» (ser maestru, pongo por casu) o pa la so «alministración títere» (por exemplu, ser funcionariu del Principáu). Ridículo, ensin más. Tamién dicen que quiero ser un clon de Fermín Muguruza. Esto yá ye de traca cuando l’acusación vien (toi cásique seguru) d’una xente qu’arrecostina una frustración tremenda porque Asturies nun ye Euskal Herría y nun pueden ser verdaderos abertzales como colos que comparten txikitos depués de desplazase hasta Bilbo p’asistir a la última manifestación proamnistía. Padezo d’autobombu, dicen. Pos, pa ser Dixebra un grupu que siempre funcionó de manera autoxestionaria, ensin representantes, nin con una gran compañía detrás, esa acusación ye la prueba evidente de que lo fiximos y lo facemos perbién. Tamos llogrando trespasar la barrera idiomática y ideolóxica y llegar al conxuntu de la sociedá asturiana, y ello colos medios que tenemos al nuestru algame, que lóxicamente utilizamos al nuestru serviciu y nun nos tenemos qu’avergonzar por ello. Y asina podría siguir hasta l’infinitu y más allá, desmontando llevantos y acusaciones inconsistentes, nuna xera que nun llevaría a nengún llau y que m’ocuparía bien de tiempu.

Volviendo a los amigos del anónimu cibernéticu, tengo que dicir que la inorancia, la envidia y l’odiu ta faciendo munchu dañu nes sos mentes y qu’habíen dir miralo. Amás, diz muncho tamién de los medios que se presten a esi xuegu del (como dicimos nel nuestru últimu discu) «catalogar blancos andantes pa dispara-yos cuando nun tean delantre». Los sos responsables, abellugaos embaxo l’árbol sagráu de la llibertá d’espresión, creen que faen dalgún serviciu al debate necesariu nel senu del movimientu de reivindicación llinguística y nacional d’Asturies, pero realmente son cómplices y amparadores de los instintos más baxos. La so permisividá hacia esos mensaxes nun tien absolutamente nada que ver cola llibre espresión y la llibertá d’opinión y sí cola desinformación y l’antiperiodismu, valiendo unicamente pa emporcar l’ambiente y xenerar mal rollu (y, por favor, que nun me fale naide de censura, que nun se trata d’eso).

Otra de les consideraciones y reflexones que me produz tou esti fenómenu ye que con él rescampla como nunca l’infantilismu, falta de formación y poca chapeta que ta demostrando un sector de les xeneraciones nueves del nacionalismu asturianu. Si esto ye un síntoma d’él, nun m’estraña que teamos onde tamos: na más absoluta de les irrelevancies sociales y polítiques… y pa siguir. Mentanto, sacante dellos apoyos puntuales (a los que voi tar siempre agradecíu) y l’ánimu del círculu más cercanu, la “masa crítica” del asturianismu asiste impasible y con desdén al mio linchamientu públicu, somorguiaos nuna especie d’omertá a l’asturiana y dando por irremediable esta situación, conviviendo con ella y colos sos instigadores.

 Habíemos cambiar el chip y escomenzar a pensar en positivo. Hai qu’entrar na fase de construir, de xenerar, d’articular, de respetar, de crear… Hai qu’escaecer la intolerancia, el dogmatismu y la sinrazón. Hai qu’almitir la diversidá d’estratexes y de puntos de vista, salir a la superficie y abandonar les cibercloaques.