El Principáu recorta les inversiones en publicidá un 36,4% nos primeros nueve meses del 2009

El Principáu d'Asturies invirtió ente xineru y setiembre del 2009 cerca de 0,9 millones d'euros, un 36,4 por cientu menos que nel mesmu periodu del 2008. D'esta manera, Asturies ocupa la última posición na llista d'anunciantes de l'Alministración Autonómica demientres los nueve primeros meses del 2009.

Na llista por conceyos, el de Xixón alcuéntrase ente los ventes que más invierten en publicidá. Concretamente, el xixonés ye'l decimoquintu de la llista, con una inversión superior a los 0,2 millones d'euros, demientres los primeros nueve meses del añu, un 41,5 por cientu menos que nel mesmu periodu del 2008.
 
Según los datos presentaos pola consultora Medio Público, la inversión realizada en medios publictarios ente xineru y setiembre del 2009 pol conxuntu de les Alministraciones Públiques españoles redúxose un 25,5 por cientu, acelerándose la tendencia baxista qu'entamó a primeros del 2009.
  
Por tipu d'Alministración, les comunidaes autónomes son les que más recorten les sos inversiones, pasando de 106,4 millones d'euros nos primeros nueve meses del 2009 a 73,2 millones d'euros ente xineru y setiembre del mesmu añu. A pesar d'ello, siguendiendo'l mayor inversor, sigíu pola Alminsitración Xeneral del Estáu, les Alministraciones Llocales, y les Provinciales.
  
Ente xineru y setiembre del 2009, la inversión publicitaria de les Alministraciones Públiques en medios de comnicación algamó los 178,9 millones d'euros frente a los 240,1 millones nel mesmu periodu del 2008. Esto supón una cayida de dos puntos más de lo que se produxo nel 2008 sobre'l 2007 demientres el mesmu periodu.
  
L'Alministración Autonómica sigue siendo cabezalera en volume d'inversión publicitaria, anque l'Alministración Xeneral del Estáu recorta distancies con una inversión de 70,5 millones d'euros. Les Alministraciones Llocales y les Provinciales invirtieron 28,8 y 6,3 millones respeutivamente.
  
Ye tamién l'Alministración Autonómica la que protagoniza'l mayor recorte nes sos inversiones en medios publicitarios demientres los primeros nueve meses del añu con respeuto al mesmu periodu del añu anterior (-31,5 por cientu). Síguenlu les Alministraciones Llocales  con un recorte del 25,7 por cientu, y l'Alministración Provincial (-23,5 por cientu). Pela so parte, l'Alministración Xeneral del Estáu, que nel 2008 foi la que más reduxo les sos inversiones, ye agora la más moderada (-18,1 por cientu).
  
La Televisión y la Prensa son los medios de comunicación que más inversión publicitaria perdieron nel periodu de tiempu estudiáu. La perda d'ambos representa'l 73 por cientu de la perda total d'inversión publicitaria. A pesar de los recortes, ambos siguen siendo los principales medios de comunicación, nos qu'invierte'l sector públicu, con gastos de 65,2 millones d'euros en Televisión y 63,5 millones en prensa. Igual que nel 2008, Internet ye'l mediu que menos baxa (-1,2 por cientu), asitiándose yá per delantre del cine n'inversión publicitaria.