"Google" faise col Premiu Príncipe d'Asturies de Comunicación y Humanidaes

|

El xuráu encargáu de decidir el Premiu Príncipe d'Asturies de Comunicación y Humanidaes diz que Google fizo una "contribución decisiva al progresu de los pueblos, penriba de les llendes ideolóxiques, económiques, llingüístiques y raciales.

Nel acta, que foi lleíu n'Uviéu pol presidente del xuráu Manuel Olivencia, sorráyase la "revolución cultural" que supunxo Google en malpenes una década al averar, a centenares de millones de persones, la enorme fonte d'información de la Rede, faciendo por algamar "un accesu xeneralizáu al conocimientu".

La candidatura de Google, consideráu'l meyor buscador de la historia, foi propuesta por José Luis Pardos, embaxador d'España y miembru del xuráu. Asina mesmo tien el sofitu d'Al Gore, premiu Príncipe d'Asturies de Cooperación Internacional 2007, y Vinton G. Cerf (Investigación Científica y Téunica 2001).

Nesta edición participaben un total de 25 candidatures procedentes d'Albania, Alemania, Bulgaria, Canadá, Estaos Xuníos, Finlandia, Irán, México, Polonia, Reinu Xuníu, Venezuela y España. Hasta'l final llegó tamién l'axencia Magnum Photos. El xuráu tuvo integráu por José Antonio Álvarez Gundín; Ignacio Bayón Mariné; Emilio Casinello; Alejandro Echevarría; Javier Gómez Cuesta; Javier González Ferrari; Álex Grijelmo; José Luis Gutiérrez; Miguel Ángel Liso; Manuel Lombardero; Ramón López Vilas; Catalina Luca de Tena; Hans Meinke; Ana Rosa Migoya; Jaime Montalvo Correa; Rosa Montero; Beatriz de Moura; Manuel Olivencia; Pedro Páramo; José Luis Pardos; Alberto Pico; José Antonio Sánchez; Ricardo Senabre; Jesús de la Serna; Enrique Ybarra y Juan Luis Iglesias Prada.

Ésti foi'l cuartu de los ocho premios Príncipe d'Asturies que se conceden esti añu, en que cumplen la so XXVIII edición. Anterioremente fueron otorgaos el Premiu Príncipe d'Asturies de les Artes a les Orquestes Xuveniles y Infantiles de Venezuela, fundaes por José Antonio Abreu; el de Cooperación Internacional a cinco organizaicones qu'encabecen n'África la llucha escontra la malaria: el d'Ifakara Health Research and Development Centre (Tanzania), The Malaria Research and Training Center (Mali), el Kintampo Health Research Centre (Ghana) y el Centru d'Investigaçao em Saúde de Manhiça (Mozambique); el premiu Príncipe d'Asturies d'Investigación Científica y Téunica foi concedíu a los científicos Sumio Iijima, Shuji Nakamura, Robert Langer, George M. Whitesides y Tobin Marks, qu'encabecen la creación de nuevos materiales al serviciu de la humanidá.

Contador Estadistiques