El Polisariu denuncia la detención d'una moza saharaui tres visitar a Haidar

Les fuerces de seguridá marroquís detuvieron y supuestamente torturaron a la moza saharaui Fatimetu Mint Rahel al tentar de visitar la casa de l'activista Aminetu Haidar n'El Aaiún, según informó esti llunes el Ministeriu de los Territorios Ocupaos y de les Comunidaes Saharauis nel Esterior de l'autoproclamada República Árabe Saharaui Democrática (RASD), que lidera'l Frente Polisariu.

Según esta fonte, citada pola axencia saharaui SPS, Fatimetu quedó arrestada y conducida a una comisaría de la Policía marroquí onde la interrogaron demientres trés hores. La moza, según relató a l'axencia l'activista saharaui Hmad Hamd, salió de la casa de Haidar "cantando lemes a favor del Frente Polisariu y quedó detenida".
 
La propia Fatimetu, según  Hamad, indicó-y que "los axentes golpiáronla en repetíes ocasiones, insultáronla y amenazáronla con violala". Según esti defensor de los Derechos Humanos, que la visitó'l domingu na so casa y que l'alcontró "mui asustada". La moza, añadió, presenta firíes y hematomes per tol cuerpu.
  
Les entrugues de los axentes yeren pa "conocer los motivos de la visita de la moza y les sos rellaciones col Frente Polisariu", a lo que Fatimetu respondió que quería "felicitar a Aminetu Haidar pola so torna", indicó Hamad.