El Bloque quier abrir la negociación de la Llei d’Evaluación

El Bloque por Asturies dio güei a conocer el so posicionamientu sobre la Llei d’Evaluación Docente, nel que fai un llamáu a la reflexón y desixe que s’abra la negociación a propuestes “que de verdá apuesten por una meyora de la calidá de los servicios públicos, axustaes a la llegalidá, con ausencia de discriminaciones salariales ente persones que desarrollen el mesmu trabayu y con criterios oxetivos d’evaluación y mesmos niveles de promoción profesional pa toles estayes de l’alministración”.

El Bloque manifestó al traviés del so voceru nacional,  Pablo Fernández, que llamenta fondamente “la urxencia cola que se ta tramitando dichu Proyectu y la falta de tiempu p´avanzar n’alcuerdos con tola comunidá educativa”.
 
Una de les “solombres” que diz atopar la organización nel proyeutu de llei ye que nun vien avaláu pola totalidá de la comunidá educativa (Conseyu Escolar, Mesa Sectorial, Xunta de Personal Docente, etc.), y  señalen como lo más importante que según ta plantegáu nun ayuda a resolver los problemes y les verdaderes necesidaes del sistema educativu, “nin muncho menos los retos de futuru n’educación del nuestru país”.
 
La organización indica tamién como aspectu negativu ya inxustu que se vaya facer efeutiva, según señalen, una discriminación salarial cola que s’incumple’l principiu d’igualdá de salariu pol mesmu trabayu desempeñáu.
 
Pal Bloque l’actual propuesta básase nun sistema d’incentivos venceyáu a un sistema d’evaluación con unos criterios non oxetivos que van crear un grave malestar nos centros educativos. Amás, señalen que’l sistema d’incentivos tamién cuenta col riesgu de ser declaráu anticonstitucional, tal y como espresaren diferentes espertos en Derechu Alministrativu na Xunta Xeneral del Principáu d’Asturies.