La revista "Estoyu" dedíca-y el primer númberu a la Lliteratura Infantil y Xuvenil

Ediciones Trabe acaba de dar anuncia de la espublización del primer númberu de "Estoyu. Revista de Llibros", publicación que naz col envís de dar a conocer los llibros editaos n'Asturies en cualesquier de les sos llingües, y que va ser distribuida de baldre per llibreríes, biblioteques y centros educativos. Nesti primer númberu la revista encara'l mundu del llibru infantil y xuvenil n'Asturies pente medies d'artículos especializaos, entrevistes a autores y editores y recomendaciones lliteraries.

D'esta miente'l primer númberu cuenta con artículos como "Lliteratura Infantil y Xuvenil: la fábrica de llectores", del escritor y filólogu Xuan Santori o "Hai o nun hai tema" del especialista en LLIX Severino Antuña. D'otra manera la editora Ángela Sánchez Vallina y la ilustradora Esther Sánchez Vallina falen del proyectu qu'entamaron nel añu 2006 cola editorial Pintar-Pintar na entrevista "Un mundu de colores". Ensin abandonar la estaya d'entrevistes la ilustradora Ana Sáez fala del so trabayu nel llibru de Berta Piñán "L'estranxeru" ente otros trabayos, al tiempu que la propia Berta Piñán esplica los motivos polos que s'averó a la lliteratura pa los más mozos.
Per otru llau, y no que cinca a la estaya de llibros encamentaos, la revista contién dellos artículos sobre novedaes del mundu editorial como "Harry Potter y la piedra filosofal" na torna de Xesús González Rato, "Khaos" d'Adolfo Camilo Díaz o llibros que tán pa salir como "Fontenebrosa II" de Vicente García Oliva; amás d'una abundante ya interesante riestra de reseñes coles novedaes d'esti últimu añu.
La revista pue descargase na so versión PDF nel blogue d'Ediciones Trabe.