Serbia presenta formalmente la so solicitú d'ingresu na UE

|

Serbia presentó esti martes formalmente la so solicitú d'ingresu na Unión Europea ante les autoridaes de Suecia, qu'hasta'l final de mes lleva la presidencia de turnu del bloque. El presidente serbiu, Boris Tadic, reconoció qu'esti pasu ye sólo l'entamu.

"Ye una cuestión completamente diferente si algamáremos l'estáu de candidatu (a entrar na UE) antes de completar la nuesa cooperación col tribunal de L'Haya", adelantó esti llunes Tadic en referencia al Tribunal Penal Internacional pa l'antigua Yugoslavia (TPIY).

La detención del ex xefe del Estáu Mayor serbobosniu Ratko Mladic acusáu de crimes de guerra pol TPIY poles sos aiciones demientres la guerra de Bosnia, ye una de les cuestiones pendientes nes rellaciones ente Serbia y la Unión, polo que se cree que los serbios tienen poces opciones d'unise a los Ventisiete mientres Mladic siga en llibertá.
 
A primeros de mes, la UE desbloquió l'acuerdu interín comercial con Serbia y llevantó les restricciones a la emisión de visáu pa serbios, macedonios y montenegrinos, que dende aquélla puen viaxar llibremente a territorios de los estaos miembros.
  
Sicasí, tovía ta pendiente de confirmación l'Acuerdu d'Asociación y Esabilización (AAE) colos Ventisiete, puesto que Países Baxos insiste na necesidá de qu'a Mladic lu estraditen al TPIY.
  
D'ente les antigües repúbliques yugoslaves, sólo Eslovenia, que ye la más rica, algamó sumase a la UE. Croacia, miembru de la OTAN dende esti añu, pretende acabar coles sos negociaciones d'accesu a lo llargo del 2010 y entrará na UE nel 2012. Albania, Macedonia y Montenegro yá presentaron la so solicitú d'ingresu pero tovía tienen qu'entamar coles negociaciones.
 

Contador Estadistiques