Ximiélgame.net, una rede social n’asturianu

Los responsables d’Altuxa, cola collaboración de Softastur, tan trabayando al traviés del dominiu ximielgame.net nel proyeutu d’una rede social n’asturianu qu’anguaño ta en fase de pruebes. Va ser un complementu a Facebook o Twitter, yá que según señala ún de los sos responsables, Mikel González “nun tien sentíu dexar aislláu Ximiélgame, sería como facer un guetu d'asturfalantes”.

Mikel González indica que tovía nun hai un plazu pa presentalu, “lo que si tenemos pensao cuando tea un pocu más avanzao'l sistema ye, unviar invitaciones a blogueros que tean interesaos o facer sorteos entre xente qu'amuese interés en probalu”. El proyeutu ta faciéndose ensin nenguna subvención, “non porque seyan indignes, sinón porque al ser un presupuestu tan ridículu'l que destina'l Principáu al fomentu del asturianu, creemos que ye meyor dexar eses perres pa proyeutos que les necesiten más”.
 
No que cinca al so furrulamientu González esclaria que ye modular, “polo que de momentu será piquiñín pero diremos ampliándolu poco a pocu”. De momentu cuenten con serviciu de microbloging (nomáu "El telégrafu"), un sistema pa guardar enllaces na cuenta del usuariu (como los marcadores d'un restolador pero online), una especie de "muru" asemeyáu al de Facebook y tamién hai un sistema de mensaxería interna. “Inda tamos trabayando en dellos módulos más pero especialmente tamos enredaos cola integración con otros servicios”, señala.
 
Pel momentu yá tienen completa la integración con Twitter y tán finando la d’identi.ca. El siguiente pasu ye integralu con Facebook, “anque esto cuido que va danos un poco más dolor de cabeza porque l'API de Facebook (API ye’l sistema qu'usa dos aplicaciones pa comunicase ente si) ye bastante más gochu y complexu que'l de twitter o'l d'indenti.ca, pero la idea ye poder usar l'avatar y datos de facebook en Ximiélgame, y integrar los mensaxes de facebook nel tableru personal de Ximiélgame”, esclaría González.