Falanoncaduca despídese hasta’l branu pa grabar el so primer discu

El grupu asturianu ska-fusión Falanoncaduca va ufrir tres conciertos n’homenaxe a Carlos “Gaites”, saxu del grupu emigráu a Polonia y que “tornó a casa per navidá”. Esta minixira va llevalos a los chigres El Teatrucu de Ḷḷena, L’Habana de Mieres y El Baruku de Xixón. Va ser la única oportunidá de ver en direutu al grupu hasta’l branu de 2010, yá que’l restu l’añu van tar componiendo’l so primer discu.

Dende Falanoncaduca quixeron convidar a dellos músicos asturianos a xubise al escenariu; Ana de La Fuente y Marco Castañón (Skanda) al vigulín y la flauta, Nel Muñiz (Palawer) con flauta y guitarra acústica, Imanol (True k d’art) al clarinete y Delfín Valdés (La Tarrancha/K-Nalón) a la voz, “son los músicos confirmaos qu’aportarán el so granín d’arena en dalgunes de les tres cites”, señalen.
 
La formación ska-fusión quier qu’estos conciertos sían toa una folixa y pa ello cuntarán con sorteos, proyecciones, nuevu repertoriu… amás de la grabación d’estes tres cites en vidiu pa editar nun futuru material audiovisual que recueya l’espíritu de lo que ye l’autodenomáu “Mecigayu son”.
 
Tolos conciertos lleven entrada de baldre siendo’l 25 n’El Teatrucu de Ḷḷena a les 23.30 – esti día actuará tamién un grupu invitáu-, el 26 nel Café Habana de Mieres a les 20.00 y el del 5 xineru n’El Baruku de Xixón con hora por confirmar.