Bush: "Arrepiéntome de dalgunes coses que nun debí dicir"

El mandatu como presidente d'EE.UU de George W. Bush ta na recta final y col so sucesor, Barack Obama, ocupando casi toles miraes y los titulares, el xefe d'Estáu saliente echó la vista atrás nuna entrevista na que s'arrepiente "de dalgunes coses que nun debió dicir", y deséa-y suerte al políticu demócrata. Del mesmo, definió la so victoria nes recientes elecciones como "un momentu históricu pal país".

"Arrepiéntome de dalgunes coses que nun debí dicir", reconoció Bush, nuna entrevista la cadena CNN recoyida por Europa Press. Nesti sen, refirióse concretamente a dos de los sos más comentaos comentarios como los que pronunció sobre la detención del cabezaleru d'Al Qaeda, Osama Bin Laden, al que reclamó "vivu o muertu". Amás, con un "traéimelos" pidió l'arrestu de los terroristes islamistes.

De la mesma manera, Bush mostróse arrepentíu de declarar "misión cumplida" el 1 de mayu del 2003, cuando dio por acabaes les operaciones a gran escala na guerra d'Irak. El presidente espresóse d'esta manera dende'l buque militar Abraham Lincoln, y ayeri sorrayó que'l so mensaxe taba únicamente dirixíu a "la tripulación". D'esta frase sacóse al so xuiciu, "que Bush pensaba que la guerra d'Irak acabare", pero caltién que "nunca" dixo eso.

Tres un actu d'homenaxe nel Día de los Veteranos, y pese a los puntos malos de los sos dos mandatos, Bush manifestóse "arguyosu de ser el comandante en xefe d'una población tan xenerosa y valiente que va valir voluntarimaente al país en tiempos de guerra". "Toi arguyosu cuando veo a xente qu'alimenta a los esfamiaos. Toi arguyosu cuando toi n'África y veo a voluntarios ayudando a ciudadanos que muerren de sida", añadió.

SUERTE A OBAMA

Bush tamién se refirió a la entrevista caltenida'l llunes col so sucesor, al que recibió na Casa Blanca xunto a la so muyer, Michelle Obama. Enantes d'esti conceyu, el presidente saliente llamó per teléfonu al so predecesor, Bill Clinton, col que comentó la primer toma de contautu que dambos caltuvieron cuando Bush ganó los comicios del 2000.

"Recuerdo la conversación que tuve col mio predecesor, Bill Clinton", esplicó, añadiendo que lu llamó'l llunes pa comenta-y: "Bill, toi llistu p'alcontrame col nuevu presidente, recuerdo lo educao que fuiste conmigo". "Espero ser igual d'educáu col presidente electu Obama", aseguró.