La llingua asturiana vuelve a Mercaplana

La llingua asturiana vuelve a tar presente la Feria Infantil Mercaplana pente medies del stand que la Oficina Municipal de la Llingua tien instaláu nel pabellón 1 del recintu ferial. Con ésti yá sumen seis los años nos que'l serviciu de normalización llingüística del conceyu de Xixón fai por averar la llingua asturiana a los más mozos al traviés d'actividaes tan prestoses como xuegos, construcción d'instrumentos o mazcaraes mitolóxiques.
Durante los díes que dura la feria, qu'entamara'l pasáu domingu 19 d'avientu y durará hasta'l próximu día 4 de xineru, el stad cuntará con actividaes permanentes y actividaes especiales. Ente les permanentes rescampla la esposición del llibru "Les coses que-y presten a Fran" de Berta Piñán y ganador del premiu de la Crítica d'Asturies, y la Mazcarada Mitolóxica que permitirá a los neños y neñes que pasen pel sitiu tresformase en xanes, cuélebres o trasgos.
D'otra miente, y no que cinca a les actividaes especiales, el stand recibirá los díes 19 y 26 d'avientu y 2, 3 y 4 de xineru a les 18:30 hores la visita d'unos músicos que-yos enseñarán a los neños y neñes l'oficiu de luthier. Asina mesmo del 20 al 30 de xineru a la mesma hora, l'espaciu va camudar nun gran tableru de "Monopoli" versión playa col xuegu "Xixónpolis".