CC.OO, Suatea y CSIF critiquen el proyectu de Llei d'Evaluación y dos lletraos alvierten de la so inconstitucionalidá

Los representantes de los sindicatos CC.OO, Suatea, y CSIF mostraron güei nel Parlamentu la so oposición al Proyectu de Llei d'Asturies d'Evaluación de la Función Docente y los sos Incentivos, polo que llegaron a pidir la retirada del mesmu, en palabres de la representante de Suatea, Beatriz Quirós. Amás, los lletraos, Carlos Álvrez-buylla y Teresa Gallart alvirtieron de la posible inconstitucionalidá del proyectu que calificaron.

Los sindicatos comparecieron güei na Comisión d'Alministraciones Públiques de la XXPA pa dar cuenta del so paecer sobre'l Proyectu de Llei del Principáu d'Asturies d'Evaluación de la Función Docente y los sos Incentivos.

El primeru n'intervenir foi'l representante d'UXT, Indalecio Estrada, que defendió'l proyectu de llei y apelló a la resposnabilidá de los diputaos pa que l'articulación de la llei, que meyorará'l serviciu públicu docente, seya una realidá. Estrada recordó amás qu'hubo profesionales de CC.OO y de CSIF qu'a la escontra de los dictames de les sos organizaciones incorporáronse a la carrera y felicitólos por ello.
  
Nel mesmu sen, manifestóse'l Secretariu xeneral d'ANPE Asturies, Gumersindo Rodríguez, que criticó a CC.OO por "firmar nun sitiu lo que nieguen n'otru". Quiso amás desmentir informaciones interesaes qu'acusen a la organización firmante de facer el trabayu suciu a l'Alministraicón porque nada más lloñe de la realidá. "La nuesa posición foi dende lo primero coherente y reivindicativa. ANPE socribe l'acuerdu nun exerciciu de coherencia y responsabilidá", dixo.
  
El secretariu xeneral de la Federación d'Enseñanza de CC.OO, Enrique Fernández, mostróse contrariu al proyectu y insistió en qu'a la so organización prestába-y que fuere una llei pa tolos docentes y non sólo pa parte d'ellos.
  
"Nun dudamos de la llexitimidá de toles organizaciones pa firmar acuerdos cola alministración, pero dalgo tan importante como lo que trayemos güei al Parlamentu debería tener l'apoyu de toles organizaciones sindicales, o como mínimo de la mayoría, y esti proyectu de llei nun trai l'apoyu nin de la mesa sectorial d'educación, nin de la xeneral, porque en nengún casu hai apoyu sindical mayoritariu", dixo Fernández.
  
Insnistió en que CC.OO ta a favor de que toos cobren, firmaren o non la carrera, porque esa resolución ta anulada y amás tolos profesores faen el mesmu trabayu. Tamién añadió qu'ofrecieron a l'Alministraicón unos plazos p'abonar estes cantidaes, pero l'Alministración nun quiso sentir falar d'esti asuntu. "Nun mos negamos a la evaluación, faltaría más, pero'l proyectu de llei vuelve cayer nos mesmos errores", dixo a la vez qu'insistió en que reclamen que se llexisle pa toos.
  
La secretaria xeneral de Suatea, Beatriz Quirós, repitió nel Parlamentu que'l proyectu de llei nun tien base llegal y refirióse a la discriminación salarial a veces de 7.000 euros que sufren los docentes. "Tamos ante la degradación de la Educación asturiana con  una llei que pretende discriminar pa tola vida a bona parte del profesoráu", dixo.