El Bloque acusa a Delegación de Gobiernu y a la direutiva del Sporting de permitir los fechos de L’Arena

En rellación colos fechos acontecíos nel barriu de L’Arena poco enantes del partíu del Real Sporting col Sevilla C.F., el Bloque por Asturies camienta que ye incompresible que la Delegación del Gobiernu y la direutiva del Sporting nun actúe a tiempu pa que nun pasen coses nun partíu que se presumía de munchu riesgu.

El Bloque recuerda que nel mes de febreru d’esti añu 2009 y coincidiendo cola visita del equipu andaluz, yá avisó mandando una carta a la Delegación del Gobiernu español n’Asturies y a la direutiva del Real Sporting, del aicionar de los ultres del equipu Sportinguista. Daquella’l Bloque por Asturies, igual qu’otres organizaciones a nivel estatal como el Movimiento contra la intolerancia, denunció les pancartes y los glayíos racistes y xenófobos na grada sur d’El Molinón..
 
“Tampoco s’acaba de comprender el consentimientu de la directiva del Real Sporting con un sector de l’afición al que da tou tipu de facilidaes pa que faigan de la grada sur d’El Molinón un sitiu pa que grupúsculos d’estrema derecha y neonazis recluten a xente mozo aprovechándose de l’animación y de que los precios son más baratos”, camienta la organización asturianista.
 
Pal Bloque, los ultres sportinguistes nun representen l’afición sportinguista “que s’avergüenza mayoritariamente de la so actitú, o incluso tien que sufrir agresiones por nun compartir les sos idees filonazis”. La organización recuerda qu’hai diez meses avisaron y había quien lo tomaba a risa y dicía que namás yeren insultos d’unos chavales que se dedicaben a animar, “esta selmana tamos llamentando una desgracia que por poco acaba en muertes, veremos ver que pasa la prósima vez. Seguramente los qu’agora callen mañana sean los primeros en condenar y llamentar”.