Mahmud Abbas pronostica un acuerdu n'Oriente Próximu pa dientro de seis meses

El presidente de l'Autoridá Palestina, Mahmud Abbas, señaló esti martes que si Israel interrumpe dafechu la construcción d'asentamientos hebreos que s'alcuentren en territorios ocupaos, como recueye la 'fueya de ruta', podría algamase un acuerdu de paz nel plazu de seis meses.

Abbas señaló que faló nes útlimes selmanes hasta en dos ocasiones col ministru de Defensa Israelí, Ehud Barak, a quien pidió que conxele demientres polo menos mediu añu l'actividá nos asentamientos, incluyíos los de Xerusalén Este. Demientres esi tiempu, el cabezaleru palestín considera que les dos partes podríen sentase a la mesa de negociaciones y hasta algamar un acuerdu definitivu. "Tovía nun recibí respuesta", llamentó, nuna entrevista col diariu 'Haaretz'.

Nesti sen, recordó qu'existe una 'fueya de ruta', que contempla'l cese de l'actividá nos enclaves xudíos, ente otres demanes d'ambes partes. Abbas señaló que pela parte que-y correspuende cesaron los ataques terroristes y reconocen a Israel como Estáu, como recueyen dalgunos de los pidimientos del testu.
  
"La situación de seguridá en Cixordania ye escelente", afirmó, contraponiendo la bona voluntá palestina colos "arrestos" o "demoliciones" que cada día sufre esti pueblu nos territorios ocupaos.