El gobiernu francés refuga facer una llei que protexa les llingües minoritaries

El gobiernu francés nun va protexer al traviés d’una llei les llingües minoritaries falaes nel Estáu yá que “entra en conflictu colos entamos d’indivisibilidá de la República”. Asina s’espresó’l ministru d’Identidá Nacional, Eric Besson, énte una entruga de la socialista Martine Faure, valtando asina coles promeses de Nicolás Sarkozy y de l’anterior ministra de cultura sobre la regulación de les llingües minoritaries.

En xunetu de 2008, les llingües rexonales entraron na Constitución francesa al traviés del artículu 75.1, onde s’afitaba que pertenecíen al patrimoniu de Francia. Sicasí, la mención de la diversidá llingüística recoyíase nel apartáu dedicáu a les colectividaes rexonales, dando asina prioridá al francés, recoyíu nel artículu dos como llingua de la República.
 
L’anunció de Besson, fecho demientres l’alderique parlamentariu sobre identidá nacional, supón un fuerte golpe a tolos grupos que trabayen poles llingües minoritaries dientro del Estáu francés (franco-provenzal, occitanu, gascón, bretón, corsu, catalán, alsacianu, vascu y neerlandés).
 
Les llingües rexonales tarán presentes na Constitución francesa (22-5-2008)