El 'sí' a la independencia de Cataluña arrasa anque la participación nun llega al 30%

|

 El 'sí' a la independencia arrasó esti domingu, col 94,71 por cientu de los votos a favor y el 3,53 a la escontra, nos 166 conceyos catalanes nos que se convocaron consultes, anque la participación nun algamó'l 30 por cientu de los ciudadanos llamaos a les urnes, según datos de la coordinadora.

Col 92,17% de los votos escrutaos --polo que la entidá sorrayó la provisionalidá de los datos-- hubo tamién un 1,76% de votos en blancu y un 0,34% de nulos.

L'alcalde d'Arenys de Munt y voceru de la entidá, Carles Mora, calificó'l día de güei de "trunfu dafechu del soberanismu" y anunció que la coordinadora llevará güei a la Mesa del Parlamentu una Iniciativa Llexislativa Popular (ILP) pa que la Cámara catalana convoque un referendu a nivel de Cataluña'l 25 d'abril.
  
Según Mora, la voz del pueblu fízose escuchar y "decidió que quier la independencia y que quierla agora", polo qu'encamentó a la clase política qu'asuma les sos responsabilidaes.
  
Recordó que la plataforma 'deumil.cat', yá llevó al Parlament una iniciativa nel mesmu sen que fracasó pero, tres los resultaos, la coordinadora considera que debe volvese tentar.
  
Otru de los líderes de la coordinadora, Uribel Bertran, calificó la convocatoria de "heroismu", teniendo en cuenta los medios de los que dispunxeron los organizadores, y opininó que la participación foi "esceicional", anque nun s'algamaron les sos previsiones del 40%.
  
De la mesma manera, el presidente de la xunta electoral, Josep Cruanyes, consideró un éxitu la participación nes consultes, y destacó la calidá democrática de la iniciativa, asina como'l "convencimientu" col que votaron los ciudadanos convocaos.
  
Tamién valoró mui positivamente que la primer vez na historia democrática de Cataluña, se sostituyere'l criteriu llegal de la ciudadanía, al otorgar derechu a votu a tolos ciudadanos empadronaos mayores de 16 años.
 

Contador Estadistiques