Cataluña prepárase pal 13-A

|

Sant Jaume de Frontanya ta na provincia de Barcelona y ye’l conceyu más pequeñu de toa Cataluña. Amás, convocó’l referéndum sobre l’autodeterminación pa güei sábadu, un día enantes que los otros 167 conceyos catalanes. A la una del mediudía, el 66% de la población yá fora votar.

Sicasí, nun hubo coles na biblioteca del pueblu, énte la prohibición d’usar dependencies municipales pa la consulta. El conceyu tien ventiún persones censaes con drechu a votu y sumando les tres que votaron per corréu, son catorce los ciudadanos que yá exercieron el so drechu, El 66% de los votantes.

Fin de campaña con Laporta
 
El presidente del F.C. Barcelona, Joan Laporta, un independentista declaráu, participó ayeri vienres énte 4.000 persones nel mitin de pieslle de campaña de Vic, conceyu del cotarru d’Osona, fastera onde más consultes van facese y onde s’espera cuntar con mas participación.
 
Laporta afaló a votar sí pola independencia pa forciar que se faiga un referéndum vinculante yá qu’España “nun igua los probemos sociales, económicos, llingüísticos ya identitarios del pueblu catalán”. Pal presidente del Barça, la independencia ye l’únicu camín pa ser ciudadanos de primera y amosar que “Cataluña ta viva”.
 
13-A, el modelu a siguir
 
Mañana sábadu 13 d'avientu namás ye’l gran pistoletazu de salida a les consultes sobre la independencia, depués de que’l 13 de setiembre’l conceyu d’Arenys de Munt fixera la “prueba”. Ente’l 28 de febreru y el 25 d’abril unes setenta localidaes, ente elles les grandes ciudaes y capitales de cotarros, van facer el so propiu referéndum. Por mor d’ello, la fecha de mañana ye’l modelu a siguir.
 
Barcelona, el gran día
 
Según les previsiones, la capital catalana, qu’axunta a más d’un millón y mediu de persones, celebrará la so consulta’l 25 d’abril. Pa poder facer en referéndum en Barcelona calcúlase que van necesitar 10.000 voluntarios. Por mor d’ello, cuenten qu’esta sía la última consulta y que se celebre en solitariu p'asina poder cuntar cola esperiencia de les anteriores, que nun eclipse al restu y que los conceyos que yá la fixeron sofiten la convocatoria.
 
El mundu pon los sos güeyos en Cataluña
 
Dende Turquía hasta Paraguai, la prensa internacional pon los sos güeyos nes consultes. Inclús Le Monde, un de los periódicos más prestixosos de Francia, publica una editorial col títulu de “Le mal catalan”, onde reclaman qu’Europa ponga atención a lo que ta pasando en Cataluña, yá que nun ye la única rexón d’Europa occidental “que trabaya col deséu d’emancipación” y citen al País Vascu, Flandes o Escocia.
 
Amás, reseñen que camudar les actuales llendes del continente yá nun ye sinónimu de violencia.  Del mesmu mou, señala que la entrada de nuevos países na UE fai que’l nacionalismu catalán medre, “yá que los nuevos países son más pequeños y tienen una economía más feble que la catalana”.
 
Más de 140 periodistes tán acreditaos pa cubrir la información del 13-P. Dende la BBC, France Press o la revista mexicana Proceso. El centru de prensa de la xornada electoral tará asitiáu nel Seminariu de Vic. Mientres tola xornada la organización facilitará datos de la participación ya incidencies. A la fin del día darán los resultaos de los conceyos por separáu y en conxuntu.
 
Coordinadora per la consulta sobre la independència

Contador Estadistiques