Slow Food Asturies presenta na feria 'Al gusto' de Bilbao los productos del 'Arca del Gustu Asturianu'

Slow Food Asturies presentará'l próximu fin de selmana na feria 'Al gusto' de Bilbao los cuatro productos que componen el 'Arca del Gustu Asturianu': escanda, oveya xalda, sidra natural y faba fresca. Trátase d'un catálogu de productos en peligru d'estinción enmarcaos na filolsofía Slow Food, una forma de vida qu'apuesta por "combatir la globalización mal entendida, activar la economía rural y consumir productos sanos, llimpios y xustos".

Asina lo esplicó güei en rueda prensa'l director gastronómicu de les sidreríes 'Terra Astur', y miembru del movimientu Slow Food, Lluis Nel Estrada, quien xunto a una ventena de cocineros asturianos más, compón el movimientu financiáu por Caxa Rural, qu'acudirá a Bilbao.

Nel marcu de 'Al gusto', el 'Arca del Gustu' celebrará una comisón pa incluyir ente los sos productos protexíos la carne de gochu asturcelta.
  
Según Estrada, Slow Food pretende tresformar lo que los productores asturianos puen ofrecer y crear una demanda de los sos productos de manera que produzan de manera segura. "Antes pensábase que los nuesos productos yeren los peores, agora sabemos que son bonos y poro debemos mercar alimentos de productores cercanos", añadió.
  
Amás, y siguiendo los parámetros del movimientu 'Terra Madre' llocal, los miembros del Movimientu Slow Food apuesten por consumir productos con una producción que respete'l mediu ambiente, tengan una calidá elevada y unos precios equilibraos que compensen al productor y seyan accesibles pal ciudadanu. Sobre esto último, Estrada matizó:  "nun queremos que la filosofía Slow Food torne nuna alimentación elitista, sinón en dalgo xusto pa toos".
 
Los integrantes de Slow Food Asturies pretenden crear una rede gastronómica denomada 'Restaurantes Kilómetros 0', qu'asitiarán a la comunidá, según Estrada, como "referente mundial pola so variedá y calidá de productos". Esta rede de restaurantes comprometeríase a consumir los productos del 'Arca del gustu', a realizar un consumu responsables d'enerxía y a mercar productos asturianos a los proveedores más cercanos. Amás, los restauradores tresmitiríen al cliente'l so llabor pa llograr una concienciación de la sociedá.