Xuristes pol Asturianu fai un rexistru de la discriminación llingüística

L’Aconceyamientu de Xuristes pol Asturianu tien fechu un rexistru de los casos de discriminación llingüística socedíos nel país dende 1979. Un trabayu que se quier actualizar a partir d’agora día tres día pa ser el “vergoñosu y permanente testimoniu de l’agresión llingüística escontra’l pueblu asturianu”. El rexistru quier ser el previu pasu pal entamu d’una asociación, l’Observatoriu de la Discriminación Llingüística n’Asturies.

El documentu ye un trabayu de Vítor Suárez Piñero, que recoyó en más de doscientes páxines tolos casos de discriminación dende 1979 hasta anguaño. Pa dir actualizándolo, la páxina web del Aconceyamientu vien d’abrir una sección pa recoyer denuncies –SOX-. Asina, quieren tener recoyíos tolos casos de discriminación dende l’aprobación de la Constitución hasta que “acabe l’estáu d’esceición que pa la llingua asturiana punxo en práutica l’Estáu español va pa 31 años”, esclarien.

Pa los xuristes, l’entamu de la discriminación vien de la mesma Constitución, onde la so disposición cabera diz que’l testu espublizaráse tamién nes otres llingües d’España y “el gobiernu español dexó inxustificadamente fuera l’asturianu”.