El 56% de los llectores opina que Lleón pue crear una academia si nun fraña la unidá llingüística

El 56% de los llectores d’Asturies.com camienta que Lleón podría facer la so academia de la llingua, nel casu de qu’esta trabayara en comuña con Asturies ensin frañar la unidá del idioma. La segunda opción más votada nel Conceyu Abiertu d’Asturies.com, col 30% de los votos, ye que nun fai falta crear una nueva academia yá que la normativa asturiana ye valida pa tol dominiu.

Mientres que’l 9% de los llectores camienten que los lleoneses tienen drechu a normativizar el so idioma de xeitu estremao a Asturies. El 5% diz que ye ceo pa entamar una institución llingüística al sur del Cordal enantes de trabayar nes zones onde tovía se fala.
 
Asturies.com abre güei otru Conceyu Abiertu pa conocer el puxu que-y dan los llectores a la posibilidá de que les redes sociales (Facebook y Tuenti) recueyen la llingua asturiana como idioma d’usu. Esta selmana dellos usuarios entamaran grupos de sofitu al idioma, yá que tanto Facebook como Tuenti recueyen yá los idiomes oficiales del Estáu, cosa que nun faen col asturianu.