Darréu aprovecha’l día de la Constitución pa refugar “esti marcu llegal que mos oprime y mos destrúi como pueblu”

Cola sida del 6 d’avientu, día de la Constitución española, la organización de mocedá independentista Darréu quier refugar públicamente'l marcu llegal “herederu direutu del franquismu y que foi concebíu pa caltener nel  poder a los mesmos qu’enantes movieron los filos en vida del dictador”, del mesmu mou “que mos oprime y conderga a la destrucción coleutiva como pueblu y como clas trabayadora”.

Darréu quier denunciar la “llaceriosa situación que caltién a Asturies y  al restu de pueblos del Estáu nuna situación predemocrática onde se mos  niega sistemáticamente drechos básicos como’l d’autodetermín o la  persecución del xenocidiu, drechos estos que tan recoyíos na llegalidá  internacional y poro, suscritos pol mesmu estáu español que los incumple  darréu”.
 
Pa la organización “nun ye de recibu que mientres xueces, políticos, policíes y otros  cargos de pesu nel réxime franquista algamen la xubilación y un retiru  tranquilu y afayadizu mientres hai partíos y opciones polítiques  antagonistes a estos que sufren persecución ya inclús illegalización y  cárcel”.
 
Darréu camienta que la constitución y les lleis posteriores publicaes al so amparu, garanticen que nin el réxime nin l'ordenamientu franquista van ser xulgaos, nin los sos crímenes reparaos, asina como que la llegalidá vixente nun podrá ser tresformada baxu nengún conceutu. Lo que pa ellos asegura un sistema económicu de tipu  capitalista y una integridá territorial del estáu incuestionable, “otorgando amás el papel de garante d’esta llegalidá namás y na menos qu’al  exércitu español”
 
Pa la organización “cada día son más les persones qu’abren los güeyos  ante la dinámica de destrucción social y política qu’esti Estáu mos impón” y faen un llamáu a la mocedá independentista a “asumir la  xera d’ufiertar una visión alternativa a la mocedá en xeneral, que mos  permita superar la realidá vixente dende una apuesta clara y contundente  pola soberanía ya’l socialismu, refugando les dinámiques desmovilizadores  y les polítiques antiasturianes de PSOE-IU que condergan a la mocedá  asturiana nun solo al paru y la emigración”.