Ñaz l’Anuariu Sonoru de la Música Asturiana pa recoyer la escena musical del país

L’Ensame Cultural Sonastur y Fnas.net faen un llamáu a tolos grupos musicales d’Asturies pa que-yos unvien el so trabayu pa incluyilo nel proyeutu “Anuariu Sonoru de la Música Asturiana 2009 (ASMA’09)”, onde se quier recoyer los conteníos musicales y audiovisuales de caúna de les bandes asturianes.

L’ASMA quier afondar nel puxu pola música del país y recoyer tol material sonoru y audiovisual del 2009 “bien seya al traviés d’una maqueta, discu o myspace ensin importar estilu musical, trayeutoria o llingua vehicular nos testos de los cantares”.
 
El trabayu va espublizase nos primeros díes de xineru, coincidiendo col primer aniversariu de Fnas.net. L’ASMA va ufrise dende la web musical al traviés de la llibre descarga n’internet y, acompañando la recopilación de cantares y videoclips. Va completalu un documentu con información y contautu de caún de los grupos que participen nel recopilatoriu.
 
Los grupos interesaos en ser incluíos nel Anuariu tendrán qu’unviar un cantar y/o vidioclip, acompañáu d’una semeya, biografía y datos de contautu de la formación enantes del 15 d’avientu. Pa ello, podrán facelo al traviés del corréu redaicion@fnast.net o contautando previamente col teléfonu 665516155.