David Fernández, n'asturianu, y Fernando de Luxán, en castellán, ganen el Concursu Lliterariu de la Fundación Asturias

David Fernández, n'asturianu y Fernando de Luxán, en castellán, son los ganadores de la tercer edición del concursu lliterariu de la Fundación Cultural Asturias, según informaron güei los organizadores al traviés d'una nota de prensa.

Fernando de Luxán proclamóse ganador cola historia 'Travelling de una lección de anatomía', "relatu nada conveniconal que xuega col llinguaxe y manexa con ciertu éxitu recursos d'otros xéneros", según los integrantes del xuráu. Pela so parte, David Fernández ganó col trabayu 'Quiero ser astronauta', obra que, según l'acta, "demuestra un bon manexu de los diálogos n'asturianu".

Amás, concedióse una mención especial al relatu perteneciente al taller de llectural o escritura 'Las paredes oyen', del autor Rubén Rey Menéndez, por ser un "interesante relatu d'orixinal desenllace".
  
De la mesma manera, declaróse finalista al trabayu 'Con qué sueñan las princesas', de l'autora Silvia Argüelles Robeles, por destacar nél la doble perspectiva del relatu.
  
Antonio Masip Hidalgo, abogáu, escritor y eurodiputáu del PSOE; Carmen Caballero Díaz, periodista, y directora de Edicom; Antón García Fernández, escritor; Cristina Huerta Villanueva, de la Conseyería d'Educación y Ciencia del Principáu d'Asturies; y Manuel Díaz Cancio, Secretariu de Formación y Emplegu d'UXT Asturies integraron el xuráu.