Personaxes y costumes del Antroxu

En tolos pueblos, llugares, villes, y ciudaes asturianes esistieron y esisten personaxes típicos d'estes fiestes. Yá falamos enántes de A REISADA y la so retafila de MAZCAROS, ente los que destacaben dos grupos AS GUAPAS, que cantaben y AS TOLAS que daben blincos faciendo espolín. A estos grupos pertenecien personaxes comu'l VALENCIANU, la MADAMA, EL S0LDAO, EL FALECÓN, LA BASOIRA , y la CARDADORA. Tamién falábamos del GUIRRIA de Ponga y los sos acompañantes, pero había munchos más. De munchos d'ellos tenemos memoria hsetórica y referencies. Dalgunos tan recuperaos nel modernu Antroxu Astur, pero otros munchos tan estinguíos o nun sabemos nada d'ellos. Nuevos estudios y investigaciones permitiríenmos descubrir munchos más.

Los GUIRRIOS diben vistíos de blancu, con polaines de pañu negru, faxa colorao na cintura y el pechu (tamién podía ser verde o azul), y un cinchu de cueru tremáu de cascabeles y campanines, pa facer roídu al movese, y sobremanera una llarga piértiga cola que pegaben grandes blincos pel aire y que-yos permitia desplazase rápido y saltar percima muries y sebes. Diben con un gorru llargu y picudu, cubiertu de pelleyos d'oveya, y portaben una mázcara, les más de les veces tamién colorada.

Otros personaxes yeren los VEXIGUEROS, que munches vegaes acompañaben a LOS GUIRRIOS nes sos salides y "actuaciones", y a los que s'asemeyen muncho na so traza y nel so traxe, anque nun llevaben el gorru llargu y en cuenta d'ello poníen una boína (blanca o colorada). Diben con un llátigu y unes vexigues inflaes (de corderu o cabritu) coles que solmenaben a la xente del público y a los que atopaben pel camín.

Los ZAMARRONES yeren especialmente célebres nel conceyu Llena, diben cubiertos con esterones d'espartu tiñíos de colorao y mariello y poníen, garrando la cintura, los cinchos y correes que s'emplegaben daquella pa xuncir los gües al carru. Llevaben tamién boína colorao y un pañolón del mesmu color en pescuezu.

Los ZAPARRASTROS yeren del mismu xéneru que los ZAMARRONES, y formaben parte de les célebres ZAMARRONAES. El cabezaleru de la Zamarronada yera un mázcaru vistíu de militar y enllenu de medalles.

Sidros en Valdesoto

LOS SIDROS tán mui xuníos nel so calter colos anteriores, especialmente colos GUIRRIOS. Yeren y son el personaxe típicu del Antroxu nel Conceyu Siero. En Quirós esistieron los famosos ZANCUDOS, mazcaritos que caminaben en zancos pelos pueblos y llugares del conceyu. Los ZANCUDOS tan estinguíos n'actualidá.

Comedia d'Antroxu mui popular yera la de los BARDANCOS DE CASU, comparsa de mozos vistíos con sábanos blancos y cinchos de cencerros, acompañaos por ún que facía de vieya, MARICA, y el so home, que piden un mélicu porque ella, ente burlles y xirigoncies anuncia que ta de partu. Los Bardancos busquen ente'l públicu p'alcontrar un mélicu. El "mélicu" "esamina" a Marica y diz que non-y gusta un res l'asuntu. Entós los BARDANCOS faenlu blincar percima d'una foguera, mentres que MARICA, ente glayíos y bufaes, suelta un gatu per debaxu de les sayes. El públicu mirará de ser a garralu, acabando asina la furnción.

Esistieron tamién personaxes comu la DESTROZONA, que diba peles cais d'Uviéu solmenando escobazos a la xente mentres recitaba coples y crítiques, mentando y espeyeyando a persones conocíes; políticos, eclesiásticos, y otres personalidaes de la vida pública local. En munchos puertos esistió tamién la figura del PESCADOR, que diba ximielgando una caña pescar peles cais, mirando de da-yos con ella a la xente.

Xaréu, espolín, burlles, xirigoncies, y comedies son el vezu d'estos díes, xolgoriu y folixa, y un enfotu por comer y beber ensin tasa llambionaes tan típicamente d'Antroxu comu les casadielles, les teresines, el chocolate, los frixuelos, rosquíes, y tolos pasteles posibles, asina comu carne, sobremanera de gochu, enantes del "ayunu" de la Cuaresma.

Un vezu mui caracterísiticu del Antroxu, celebráu más nes villes y ciudaes que en zones rurales ye L'ENTIERRU LA SARDINA, nel que se simboliza la muerte del Antroxu (Don Carnal; La Sardina) y el so entierru. L'actu iguase con un funeral solemne, pero fechu a chancia, nel qu'hai personaxes faciendo de cures, autoridaes, viuda, plañideres, y hasta un sermón a mou de despidida del Antroxu.

Contador Estadistiques