Revistes

Lletres asturianes
Ye’l boletín oficial de l’Academia de la Llingua dende 1982. Con una periocidá d’unos trés númberos al añu, inclúi trabayos d’investigación llingüística, histórica, lliteraria… Tamién tien una estaya dedicada a la nueva lliteratura y a la recuperación d’obres vieyes. L’Academia espublizaba pol Día de les Lletres Asturianes un númberu especial dedicáu namás a la lliteratura, pero dende 2009 esi formatu convirtióse nuna revista dixebrada nomada“Lletres lliterariu”.
 
Adréi
Revista lliteraria asoleyada n’Uviéu en 1987 y dirixida por Xuan Bello y Berta Piñán. Algamó siete númberos y quería dar un pasu más allá de “Lletres asturianes” seleicionando les obres que se diben espublizar.
 
Cultures
“Cultures, Revista asturiana de cultura” ye la revista d’antropoloxía y etnografía que dende 1991 espubliza añalmente l’Academia. El so director ye Roberto González-Quevedo.
 
Lliteratu
Ye la revista que l’Academia de la Llingua Asturiana dedica a la lliteratura. Tien una periocidá añal y ta dirixida por Xosé Bolado.
 
Asturies, memoria encesa d’un país
Empobinada pola fundación Belenos ye una revista añal d’estudios y divulgación del patrimoniu etnográficu asturianu que yá algamó los 25 númberos.
 
Formientu
Revista lliteraria dedicada dende 2006 a da-y voz a los autores asturianos ñacíos dempués de 1977. Dirixida por Inaciu Galán ta valiendo pal esporpolle d’una nueva xeneración d’autores en llingua asturiana. Edita dos númberos al añu y de xemes en cuando dedica monográficos temáticos.
 
Estandoriu
Dirixida pol escritor Pablo Rodríguez Medina, la revista quier reflexar la lliteratura d’anguaño, tanto d’autores mozos como los yá consolidaos. La revista, dedicada en cada númberu a un conceyu, inclúi trabayos d’investigación, de torna, de crítica… 
 
El llapiceru
Editada por Conceyu Bable y dirixida por Antón García foi la primer revista de cómic n’asturianu. Espublizóse en Xixón ente 1988 y 1997, algamando los 17 númberos.
 
El Gomeru
Revista asturiana de cómic pa un públicu infantil y xuvenil. Dirixida por Isaac del Rivero y editada por Trabe, foi espublizada ente 1992 y 1999 como revista y, llueu, como suplementu del diariu xixones “El Comercio”. En 2005 volvió aparecer repartiéndose de baldre en biblioteques.
 
Faceira
Editada en formatu dixital ye la primer revista n’asturianu que quier sirvir de puntu d’alcuentru pa tol dominiu. Creada en 2009 en Zamora pola asociación Furmientu, inclúi tanto testos d’investigación como lliterarios. Les obres tán escrites en llingua asturiana estandar, en dalguna variantes usando les normes académiques o en normativa mirandesa.
 
El llumbreiru
Tamién editada por Furmientu, pero en papel y repartida de baldre, tien un carácter trimestral y tien publicaos, dende 2005 , 18 númberos. Quier sirvir pa promover la llingua propia de Zamora apurriendo trabayos d’investigación, noticies, vocabularios o tornes lliteraries.