Derrota llaceriosa del Sporting en San Mamés

16 Avientu, 2008 por Asturies.com

Inicie sesión o rexístrese pa espublizar comentarios

L'Sporting perdió merecidamente frente al Athletic de Bilbao nel peor partíu de los asturianos no que llevamos de campeonatu. Los vascos, con un xuegu ordenáu y con pegada ofensiva, resolvieron el partíu na primer parte frente a un Sporting que nun supo nin defender nin atacar y nel que se noten más de la cuenta les baxes d'homes como Neru, Castro o Camacho. Pa colmo de males el porteru Cuéllar va tar de baxa cuatro meses por rotura del tobillu depués de chocar con Gurpegui yá nel descuentu..

Poca historia tuvo la visita de los xixoneses a San Mamés, por cuenta qu'un penalti d'Iván Hernandez a Llorente dió'l primer gol a los locales namás entamar el partíu. A partir d'esi momentu los vascos xugaron casi a placer frente a un Sporting desarmáu dafechu. D'esti mou a los 23 minutos Iraola mete'l segundu tres dellos despistes defensivos y a los 31 minutos David López marcó un bon gol tres rematar un gran centru de Yeste al segundu palu. A partir d'ehí acabó'l partíu. L'Sporting foi un querer y non poder y na segunda parte tuvo más cerca'l cuartu de los bilbaínos que'l primeru del Sporting.

Esta nueva derrota asitia a los asturianos nel decimusegundu puestu con 18 puntos.

Ficha técnica

Athletic Club: Iraizoz; Iraola, Ocio, Amorebieta, Balenziaga; Susaeta, Javi Martínez, Yeste (Gurpegui, min.86; Gurpegui, min.92), David López; Ion Vélez y Llorente (Del Olmo, min.89).

Sporting de Xixón: Cuéllar; Sastre, Gerard, Iván Hernández, Canella; Matabuena (Michel, min.46), Lora; Luis Morán (Maldonado, min.61), Carmelo (Bilic, min.46), Pedro; y David Barral.

Goles: 1-0, min.5: Llorente, de penalti. 2-0, min.23: Iraola. 3-0, min.31: David López.

Árbitru: Pérez Burrull. Sacó tarxetes amarielles al local Javi Martínez y a los visitantes Carmelo, Sastre y Gerard.