España va ofrecer menos de 1.000 contratos estables pa estranxeros n'orixe'l próximu añu, frente a los 15.700 del 2008

|

El continxente de trabayadores estranxeros estables previstu pal 2009 "nun va llegar a les mil contrataciones", frente a les 15.731 que se contemplaren esti añu, según l'informe acordáu esta mañana nel Conseyu Superior de Polítiques d'Inmigración y unviáu al Conseyu de Ministros pa la so aprobación enantes del final d'añu.

En declaraciones a Europa Press, la directora xeneral d'Inmigración del Ministeriu de Trabayu, Marta Rodríguez Tarduchy, esplicó qu'esi descensu penriba de les 14.000 contrataciones se debe a que nesti momentu "hai trabayadores n'España" pa cubrir los puestos disponibles. Sicasí, señaló que "na peor de les situaciones, siempre van facer falta determianes profesiones".

Esta cifra recueye'l númberu de trabayadores estranxeros con contratu de duración superior a un añu que cada comunidá autónoma prevé necesitar pal 2009, en función de les distintes ocupaciones. El resultáu ye rebaxáu pol Serviciu Públicu d'Emplegu Estatal (SPEE), que cruza les vacantes previstes col númberu de paraos que tán n'España dispuestos a ocupales, anque s'alcuentren en distintu territoriu.

Según esplicó Tarduchy, la cifra de contrataciones previstes tovía nun ye definitiva, porque Cataluña, la comunidá autónoma que más trabayadores previere necesitar, revisó a última hora les sos estimaciones, rebaxando significativamente'l total de contratos estables previstos, pa ufiertar nel estranxeru, polo que la propuesta va tener de revisala de nuevo'l SPEE.

"Ésti ye un sistema de contratación que resuelve mui bien les necesidaes de los empresarios cuando les tienen nel esterior", señaló la directora xeneral, pa calcar en que'l continxente ye'l "nucleu" de la política d'inmigración española, que rellaciona la entrada n'España a les necesidaes del mercáu llaboral.

L'informe d'acordies del continxente 2009 va unviase al Conseyu de Ministros, que va pronunciase enantes del 31 d'avientu, cuando deberá quedar aprobáu.

Contador Estadistiques