Día del Llibru Asturianu

La Xunta pola Llingua pide al Principáu que se pronuncie sobre l'informe européu y la UNA acúsalu d'engañar a la UE

|

La Xunta pola Defensa de la Llingua Asturiana exixó güei al Principáu que se pronuncie sobre l'informe del Conseyu d'Europa nel que se recomienda un mayor marcu de proteición alministrativa pal asturianu, asina como más aiciones pal so afitamientu y normalización. De la mesma manera, la Unidá Nacionalista Asturiana (UNA) acusó al Gobiernu asturianu d'engañar a la UE por atribuyir la falta d'oficialidá a que nun acabó'l procesu de codificación de la llingua.

Nunes declaraciones feches tres la publicación del documentu, Xulio Casado, voceru de la Xunta pola Defensa de la Llingua Asturiana, declaró que "nun ye la primer vez qu'instituciones o organismos europeos s'esmolecen pola situación de desamparu na que vive l'idioma propiu d'Asturies".

El portavoz de la Xunta dixo que "nos puntos 11, 112 y 113 del documentu tíren-y de les oreyes a l'Alministración por nun apurrir siquiera los datos solicitaos pol Conseyu d'Europa lo que, como afirma testualmente l'informe, amuesa la falta absoluta d'interés de l'Alministración y, lo que ye peor, que se desabre del compromisu de tomar midíes urxentes y firmes pa la normalización de la llingua. Lo mesmo podemos dicir sobre los puntos 114 y 115 onde se trata de los problemes detectaos pol Conseyu na revitalización del gallego-asturianu".

Como conclusión al análisis de la publicación del documentu, Xulio Casado quixo amestar que "lo menos que pueden facer los gobiernos asturianu y español ye responder a unes acusaciones pergraves que-yos tán faciendo dende les instituciones europees" y amestó que "ensin una alministración que faga por defender al asturianu, el so futuru ta completamente comprometíu y l'aministración asturiana y española tienen una reponsabilidá pergrande como ta acabante asoleyar esta institución europea".

"ENGAÑU" A LA UE

Pela so parte, la federación de partíos UNA denunció esta mañana que'l Gobiernu español "mintió-y al Cómite d'Espertos encargáu pol Conseyu d'Europa pa facer el siguimientu de la Carta Europea de les llingües minoritaries".

"Alegar la falta de codificación del asturianu ye mentir a costa fecha sobre la situación de la llingua, que tien un procesu de codificación ellaboráu pola Academia de la Llingua Asturiana, tres más de 20 años de trabayos nos que se desenvolvieron unes normes ortográfiques, un diccionariu y una gramática normatives, asina como la fixación de los topónimos, abondos con rangu llegal oficial", explicó UNA nun comunicáu. "Igual la calidá y la cantidá de la producción lliteraria n'asturianu, y la proyeición de dellos de los escritores n'asturianu, mesmamente fuera de les nuestres fronteres, ye contrastable y conocida dafechu", añadió.

Recordó tamién que l'Estáu Español "nun apurrió la información que se-y pidía sobre'l númberu de falantes d'asturianu y sobre la situación social de la llingua, lo que supón una clara discriminación y tapecimientu de datos sobre los falantes de asturianu que se calculen nunes 350.000 persones".

Poro, UNA pide-y al Gobiernu asturianu "que-y apurra al Gobiernu español darréu tola información pidida pa qu'esti-y la tresllade al Comité d'Espertos, y que dea cursu a los encamientos del Cómite incluyendo na próxima reforma del Estatutu la oficialidá del asturianu y de la fala-eonaviega, que según l'informe tien una situación asemeyada a la del asturianu, pa que puean cumplise dafechu los oxetivos propuestos na Carta Europea de les Llingües Minoritaries o Rexonales, que foi roblada pol Gobiernu español y ye polo tanto de cumplimientu obligáu".

Contador Estadistiques