Siero y L.lena usen l'asturianu pa educar sexualmente

Los servicios de normalización llingüística de Siero y L.lena, aprovechando la fecha del ún d’avientu, día mundial contra’l SIDA, espublizaron unos folletos col eslogan “¿Enguedeyestite, nin? ¿Enguedeyestite, ne?”, que contienen información sobre sexualidá y un preservativu.

L’oxetivu de la campaña, según los sos responsables, ye editar n’asturianu material que pueda sirvir d’apoyu a campañes d’educación sexual entamaes dende’l Conceyu. El testu organízase en cuadraos que traten mui brevemente sobre: cómo s’usa’l condón, la sexualidá ye, la sexualidá nun ye, delles verdaes, delles mentires, pa gustos hai colores y unes poques pallabres.
 
Preténdese que la información sía cenciella y fácil d’entender. Hai tamién dalgunes páxines web interesantes y señes y teléfonos onde se puen faer consultes o resolver duldes.
 
Cola subvención de la Conseyería de Cultura y la collaboración de les Oficines d’Información pa la Mocedá de Siero y L.lena van ponese en circulación mil exemplares que van tar a disposición nestes oficines. Mientres qu’otros mil van repartise en charres informatives.