El PP reclama al conceyal de Cultura d'Avilés que presente les factures de la organización del Festival Beltaine

Les conceyales del PP del Conceyu d'Avilés, Carmen Rodríguez Maniega y Carmen Venga, reclamaron güei al edil de Cultura, Román Antonio Álvarez, la presentación de les factures del Festival de Beltaine, qu'organizó l'asociación Xuntanza. Les 'populares' denunciaron en rueda prensa que-yos esmolez que "tengan dificultaes pa xustificalo, que ye'l rumor que cuerre estos díes per Avilés".

El Beltaine celebróse esti añu la primer vez tres les diferencies surdíes ente'l Conceyu d'Avilés y los organizadores del Festival Intercélticu. "Román prometiómos qu'esti añu yera la primer vez que diba haber tresparencia, y dixo que se diben presentar les factures y un informe", señaló Maniega, qu'apuntó a que "dempués de trés meses dímos-yos otru por diplomacia y debieron pensar que mos olvidáremos, pero nun ye asina".
 
Rodríguez Maniega manifestó'l so interés por saber "qué pasó colos puestos que se colocaron na plaza d'abastos, porque hubo munchos que dixeron públicamente que nun diben pagalo". La edil indicó, en tonu de mofla, que "de magar agora pienso qu'a Xuntanza vamos llamalu 'pitanza', porque val pa dar de comer a dalgún amigu más de Román".