Suburbia publica "Les siete novies del rei" de Xulio Arbesú

Suburbia Ediciones ta sacantes d’espublizar “Les siete novies del rei”, la última novela del recién ganador del Premiu Máximo Fuentes Acebedo Xulio Arbesú. El llibru recueye una obra de teatru onde se cuenta la historia del Rei Aurelio, que va casase pero pidió-y matrimoniu a siete moces, entós éstes tendrán que pasar diverses pruebes pa saber quién ye la elixida.

Según l’autor, él que ye “de los de tarariar l’himnu de Riego tolos catorce d’abril y toi escribiendo una obra monárquica dedicada a aquel rei asturianu que, según remotes cróniques, vivió nel valle del Nalón, y valió pa da-y apellíu al conceyu de San Martín. Con un protagonismu tan femenín y numberosu, nun podía asemeyase muncho a "La venganza de don Mendo". Hubi de renunciar a tan prestosu modelu, pero vive Dios que nun contaba renunciar a tres coses: Que la obra diba ser cómica, y escrita en versu, y con una escena a base de pallabres esdrúxules”.
 
Xulio Arbesú (L’Entregu, 1957), tien escrites noveles tan estremaes como la histórica “Potestes”, la xuvenil “Misión Pelayo”, la interiorista “Un raposu en Tresmonte”, la costumbrista “El pisu d’enriba” o los cuentos de “Cuentos con neños”. Ganador del Xosefa Xovellanos de novela y recién ganador del Máximo Fuentes Acebedo d’ensayu, agora, con “Les siete novies del rei”, Arbesú estrénase col teatru.