Un grupu d’empresarios catalanes crea una patronal pola soberanía

Un grupu d’empresarios catalanes vien de crear una patronal soberanista, “El Cercle Catalá de Negocis”, presidida por Ramón Carner. Según la so declaración de principios pretenden “presionar a los partíos políticos col oxetivu de que’l Parlament declare la independencia de Cataluña, “un país asemeyáu a cualesquier européu”.

Pa esti garapiellu d’empresarios, estaos como EEXX, Noruega, Finlandia, Irlanda, Estonia, Chequia o Eslovenia, ente otros, convirtiéronse n’independientes “por motivos básicamente económicos”, polo que Cataluña tien que ser “l’Estáu 28u de la Unión Europea”. Pal Cercle Catalá de Negocis l’afuegu económicu actual nun permite vacilar ente estáu y autonomía, polo que ye necesariu un círculu empresarial qu puxe polos intereses de Cataluña,
 
Pa los empresarios, cola declaración d’un Estáu catalán la so tierra “tresformaráse a si mesma, potenciando les sos empreses nel mundu, poniendo les sos infrastuctures a los niveles más altos d’Europa ya incrementando la riqueza de tolos catalanes, menguando’l númberu de catalanes que viven na llende de la probitú”.