UNA anuncia l'entamu d'una campaña institucional pa reactivar la reforma estatutaria

Unidá Nacionalista Asturiana (UNA), al traviés del so portavoz, Faustino Zapico, vien d’anunciar l’entamu d’una campaña de mociones nos conceyos pa esixir a los partíos parllamentarios qu’afronten la reforma estatutaria. La campaña va entamase en Nava y Carreño, presentando la moción Asturianistes por Nava y UNA, respectivamente. Pa los nacionalistes la reforma tien que xirar sobre trés pegoyos básicos; financiamientu, una carta de drechos y obligaciones y la oficialidá del asturianu.

Zapiño señaló que “depués de 30 años d’autonomía, fai falta una actualización de les instituciones al igual que la normativa de les nueves realidaes sociales, económiques y culturales”. Pa los nacionalistes hai un riesgu nel retrasu de la reforma estatutaria porque “ta marxinando a Asturies en temes básicos como nel del financiamientu autonómicu, onde volvimos ser una de les grandes
perdedores”. Del mesmu mou señalen que foi l’egoismu de los partíos parllamentarios el que paralizó la reforma porque “taben más esmolecíos polos sos porgüeyos partidistes que polos intereses de les asturianes y los asturianos y con esa actitú ye imposible llevar alantre acuerdos fundamentales pal desendolcu d'Asturies”.
 
Según señalen, el finaciamientu tien que garantizar los recuros necesarios pa ser a facer les polítiques que se precisen pa sacar Asturies “de la crisis social, cultural y económica na que tamos sumíos dende los años ochenta”, al igual que garantizar “una soberanía fiscal que garantice l'autonomía política d'Asturies, pudiendo asumir el nuesu propiu futuru y faciéndonos responsables de los nuesos aciertos y errores”.
 
El segundu aspectu ye una carta de drechos y obligaciones yá que “les asturianes y los asturianos tenemos que conocer tanto los nuesos derechos como les nueses obligaciones y hemos d'abrir el debate sobre temes como la renta social básica, la igualdá efectiva de xéneru y por orientación sexual, los problemes de la emigración y inmigración, derechos medioambientales y de la salú y un llargu refileru de temes que va 30 años nun teníen la vixencia de güei en día”.
 
Pa finar, UNA propón la oficialidá del asturianu, yá qu’ensin ella tase canteniendo nel tiempu una situación de discriminación inalmisble pa los asturfalantes, “que namás esixen ser ciudadanos como los demás y non de segunda como asocede anguaño”.
 
TVG NEL NAVIA-EO

Faustino Zapico tamién aprobechó p’amosar la so posición sobre la polémica de la recepción de la TVG nel Navia-Eo. UNA esixe a Feijóo que “nun use Asturies como un argumentu nos debates políticos gallegos, darréu que la política llingüística n'Asturies solo correspuende a los asturianos y asturianes”. Del mesmu mou, recordó que la política llingüística de Feijóo ye cuestionada polos defensores del gallegu y “vien de ser refugada inclusive pol Tribunal Supremu.”
 
Tamién quixo Zapico criticar la política audiovisual del Gobiernu asturianu que “arrequexa y marxina la programación n'asturianu na TPA y que nun-y manda a los medios de comunicación públicos normalizar la llingua asturiana, amás d'escaecer dafechu la fala del Navia-Eo”. Zapico recordó que "dende UNA deféndese que la TPA tien que ser una televisión con una seña d'identidá que ye la emisión en llingua asturiana".