Un xuez autoriza facer una casa a 98 metros de Santa María del Naranco

El titular del Xulgáu de lo Contencioso Alministrativo númeru 3 d'Uviéu, Miguel Ángel Carbajo, resolvió'l pasáu xueves que'l Principáu d'Asturies conceda a Francisco Farpón l'autorización correspondiente pa la construcción de "una vivienda unifamiliar aislada nel Nucleu Rural Agrupáu de Casares", asitiáu a 98 metros de la ilesia prerrománica de Santa María del Naranco. La basílica declaróla Patrimoniu Mundial de la Humanidá la Unesco, n'avientu de 1985.

L'autu, al que tuvo accesu Europa Press, --emitíu pol xuez n'execución d'una sentencia del 16 d'abril favorable al propietariu de la finca-- pon acabación a cinco años de procesu d'esti vecín d'Uviéu, que mercó nel 2004 una finca de 501 metros cuadraos pa cosntruyir un xalé nuna parcela "edificable", según el Plan Xeneral d'Ordenación Urbana (PXOU) d'Uviéu. El Principáu cuenta con un plazu de 15 díes pa recurrir la decisión xudicial.

Dende aquélla, la proteición del entornu obligó a Farpón a contratar hasta trés proyectos p'axustar les característiques de la obra a los condicionamientos de la Comisón de Patrimoniu, de la Conseyería de Cultura del Principáu, col consiguiente incrementu de costes.
  
Según consta nel autu, el pasáu 11 de mayu acordóse como dilixencia final la práctica de prueba pericial pol arquitectu superior pa determinar si los proyectos presentaos por Farpón adáutense a les exixencies del Conseyu de Patrimoniu Cultural de setiembre del 2008. Según l'informe del arquitectu Arturo Gutiérrez, los proyectos cumplíen les exixencies de Patrimoniu.
  
El lletráu de Farpón, Gerardo de la Iglesia, aseguró a Europa Press, que'l so cliente ta "feliz" y "encantáu" cola decisión del xuez porque "sufrió muncho". Farpón, que vive coles sos fíes nun pisu d'alquiler, espera entamar la obra lo primero posible.