Javier Chamorro quier crear una academia que normativice l’asturianu de Lleón

|

El presidente d’UPL, vicealcalde de Lleón y sustitutu d’Abel Pardo na conceyalía de Cultura Lleonesa, Javier Chamorro, vien d’anunciar al traviés d’una entrevista en “Diario de León” que va esixir a la Xunta de Castiella y Lleón el cumplimientu del articuláu del estatutu d’autonomía sobre la llingua, al empar que la creación d’una entidá académica que “armonice y avere a los estremaos grupos que defenden el lleonés p’algamar un consensu si hai bona disposición pelas dos partes”.

Pa Chamorro al carecer el lleonés d’una academia y nun haber normativización llégase a “determinaos tipos d’escritura que nun son compartíos per tol mundu”. Del mesmu mou, el nuevu conseyeru de cultura lleonesa, faló de que diba siguir impulsando la llingua dende’l so cargu, “anque siempre al llau y en pie d’igualdá col castellán, que ye la llingua mayoritaria de la ciudadanía”.
 
Según el presidente d’UPL fallaron les formes na promoción del idioma, “nun se supo vender la idea”, y el quier que los lleoneses vean la llingua como dalgo amable que nos enriquez y “non como una imposición”. No que cinca a la promoción de les señes d’identidá, Chamarro dixo que siguiría una política continuista a lo fecho por Abel Pardo. Per otru llau, el nuevu conseyeru de cultura lleonesa señaló que ye dafechu lleonesista y que’l so oxetivu cimeru ye algamar l’autonomía de Lleón
 
Pues lleer la entrevista entera pinchando equí

Contador Estadistiques