Asturies perderá en diez años el 4,98% de la so población, la mayor cayida del Estáu según l'INE

|

La población asturiana reduciráse nun 4,98 por cientu nos próximos diez años, al pasar de los 1.058.923 habitantes rexistraos a primeros d'esti añu a 1.006.202 previstos pal añu 2019, según l'estudiu 'La proyección de la población', ellaboráu pol Institutu Nacional d'Estadística pal periodu 2009-2019.
 
D'esta manera, Asturies será la comunidá que rexistre una mayor cayida porcentual de la so población, siguida del País Vascu, con un descensu del 3,19 por cientu, y de Galicia, onde se prevé una cayida del 3,09 por cientu.
 
L'INE fundamenta los sos datos nel descensu que yá rexistró la población asturiana ente los años 2002 y 2008, cuando los habitantes nesta comunidá reduxéronse nun 0,28 por cientu, mientres que nel total nacional l'alza algamó un crecimientu del 11,87 por cientu.
 
De la mesma manera, Asturies será una de les comunidaes nes que se rexistrará na próxima década un mayor númberu de muertes frente a los nacimientos. Según esta proyeición, el crecimientu vexetativu previstu p'Asturies esti añu yá rexistra 4.768 muertes más que nacimientos, pero pal 2018 el saldu negatvu elevaríase a 6.779 persones.
 
De la mesma manera, l'estudiu indica que la población inmigrante esperimentará un crecimientu inferior al d'años pasaos y esta tendencia tornará en que, na próxima década, va haber una tasa d'inmigrantes por cada mil habitantes del -0,01.
 
Frente a esta evolución negativa del crecimientu poblacional n'Asturies, les comunidaes autónomes pa les que se prevé un crecimientu demográficu relativo más intensu na próxima década serán Castiella La Mancha (11,4%), Rexón de Murcia (9,2%) Isles Baleares (7,8%), Comunidá Valenciana (7,3%) y Canaries (7,2%).

Contador Estadistiques