IU alvierte que nun habrá acuerdu de presupuestos hasta que nun se garantice la partida necesaria pa la dependencia

La conseyera de Bienestar Social y Vivienda, Noemí Martín, alvirtió que per parte d'IU-BA-Verdes nun habrá acuerdu de presupuestos del 2010 hasta que nun se garantice la partida necesaria pal desarrollu de la Llei de Dependencia. Asina lo señaló a los medios de comunicación enantes de participar n'Uviéu nel Congresu Nacional d'Aspaym sobre la lesión medular, y dixo que'l desarrollu de la Llei de Dependencia ye clave na negociación presupuestaria pal próximu añu.

   "A pesar qu'hai un contestu de crisis económica, y si cabe con más razón, precisamente los recuros públicios deben dir destinaos a garantizar el cumplimientu de la llei. Otru contestu pa nosotros nun ye posible", afirmó.

   Sicasí, la conseyera quiso ser "prudente" y nun detalló la cuantía que podía ser necesaria pal desarrollu del nuevu derechu, anque sí dixo que'l propósitu ye tener "la garantía de que'l desarrollu de la llei se tenga n'Asturies". "A día de güei nun lu tenemos garantizáu, y hasta que nun lu tengamos garantizáu nun se roblarán los presupuestos", remarcó.

   "La negociación presupuestaria ta nuna situación complexa, difícil y de muncha tensión", comentó Noemí Martín en rellación a les diferencies de criteriu ente los dos socios de Gobiernu, PSOE y IU, sobre los Presupuestos del 2010. "Hai que recordar que llevamos meses negociando los presupuestos y somos conscientes de que tamos nuna situación eocnómica que nun ye fácil", remarcó.

   Sicasí, tres algamar que'l presupuestu creciere pal añu que vien emplegando la capacidá d'adeudamientu, Martín considera que nesti momentu trátase la discusión sobre "a qué se dedica o a qué se destina esi crecimientu del presupuestu". "Ehí ye onde tenemos les diferencies más fonderes", apuntó.