La editorial Pintar-Pintar estrena una versión n'asturianu de la so web

La editorial asturiana Pintar-Pintar acaba facer pública, pente medies de los calces que nos apurren les redes sociales, l'estrenu de la versión n'asturianu de la so páxina web. Hasta esti momentu, y pese a tratase d'una editorial qu'espubliza bien de llibros de Lliteratura Infantil y Xuvenil n'asturianu y fala, namás yera posible consultar la información tocante a la empresa y el so catálogu editorial na so versión castellana.
Na nueva páxina de Pintar-Pintar vamos poder alcontrar información relativa a la empresa, los sos socios fundadores y, sobre manera'l so catálogu d'álbunes ilustraos que comprende obres como "Binoca" o "Poemes de Carambelu" de Marisa López Diz, "El viaxe de Tin y Ton" de Miguel Rojo,  "Menú de Versos" d'Esther García, "Chispina" o "El poema que cayó a la mar" d'Aurelio González Ovies o'l premiáu "Arroz, agua y maíz" de Berta Piñán. Caún de los títulos, amás, bien acompañáu por una Galería d'imáxenes y un vidiu rellacionáu.
D'otra miente, y tamién pente medies de la páxina web, vamos tener la posibilidá de contactar cola editorial, siguir la so axenda d'actividaes o apurrir comentarios sobre les obres que más nos prestaron.