La LLIX n'asturianu ta presente nel especial de la revista CLIJ

La revista Cuadernos de Literatura Infantil y Juvenil (CLIJ) dedica'l so númberu d'ochobre al panorama de la Lliteratura Infantil y Xuvenil a nivel estatal. Nesi contestu especialistes na lliteratura pa la reciella de les diferentes llingües del estáu faen, al traviés de dellos artículos, un repasu peles producciones del añu y les perspectives de futuru del panorama editorial y creativu. Nesti sen puen alcontrase artículos sobre la LLIX en castellán, catalán, gallegu, euskera y asturianu; poniendo un añu más la revista al asturianu al altor del restu de les lliteratures del estáu pese a ser la única de les citaes ensin consideración oficial.
L'artículu, que como n'años anteriores ta robláu pol estudiosu de la nuestra lliteratura Severino Antuña, preséntase sol títulu "La LLIX n'asturianu escosa: ¿ú ta'l relevu xeneracional?". Baxo esta premisa Antuña recuerda que, na so mayor parte, los títulos del pasáu añu tán firmaos por escritores bien conocíos sientro del ámbitu de la Lliteratura pa neños y neñes, ésti pudiera ser el casu de Esther García, Marisa López Diz, Berta Piñán o Xulio Berros. Asina mesmo sorraya que "l'apueste editorial céntrase en puxar pola calidá de la edición y n'anovación del cuadru d'ilustraciones", puntu que valora positivamente si bien recueda la falta de llibros pal públicu xuvenil sacante la obra de Carme Martínez "Cuentos maraviyosos, de mieu y misteriu".
Pa finar Severino Antuña pide paciencia a los llectores pa que nel nuevu añu xorrezan "les figures y les obres en formación". Dende "A la gueta los sueños" tamién aguardamos polo que nos pueda traer l'añu qu'entra.