Ismael González Arias gana’l II Premiu “María Josefa Canellada”

La obra “Les puertes del paraísu” del escritor Ismael González Arias ta acabante de ser premiada cola segunda edición del “María Josefa Canellada” de lliteratura infantil y xuvenil n’asturianu. El premiu, empobináu pola Conseyería de Cultura, foi dau a conocer esti mediudía na Casa de Cultura “María Josefa Canellada” de Santolaya (Cabranes) y el xuráu valoró da-y por unanimidá’l premiu por “ser una novela dirixida a un públicu xuvenil, pero que pue interesar tamién al adultu”.
La obra trata’l tema de la emigración asturiana a los Estaos Xuníos a finales del sieglu XXI con una estructura qu’alterna dos planos espaciales (Asturies y los Estaos Xuníos).
 
El xuráu taba presidíu pola Directora Xeneral de Política Llingüística, Consuelo López Vega, y cuntaba cola participación del alcalde de Cabranes, Alejandro Vega Riego; les escritores Mª Luz Pontón y Maite González Iglesias, amás d’Alonso Zamora Canellada, fíu de la escritora María Josefa Canellada. Foron trés los trabayos presentaos a esti galardón, que ta dotáu con un premiu de 7.000 euros. L’añu pasáu, la obra ganadora foi "Arroz, agua y maíz" de Berta Piñán.
 
L’escritor uvieín Ismael González Arias ye ún de los escritores más premiaos de la lliteratura asturiana, algamando en 1992 y en 2005 el “Xosefa Xovellanos” de novela coles obres “El cuartu negociu” y “En busca de Xovellanos”, respectivamente. Tamién recibió en 1998 el Premiu “Fuertes Acebedo” pol ensayu “L’asturianada”, escritu en comuña con Xaime Arias, y en 2004 el “Enriqueta González Rubín” de periodismu por “La tonada como música culta asturiana”. Anguaño ye director de la Casa de Cultura “Teodoro Cuesta” de Mieres y presenta y dirixe’l programa de la RPA “Música, músiques”.