Caxastur faise con Caja Castilla-La Mancha

La Comisión Executiva del Banco de España ta acabante de dar el preste a la ufierta económica por valor de 400 millones d'euros fecha por Caxastur pa facese col control de Caja Castilla-La Mancha (CCM). Según la máxima autoridá bancaria del Estáu, esa ufierta d'integración de la entidá manchega en Caxastur ye la que meyor cumple los criterios de solidez y racionalidá económica y financiera. Amás cumple col oxetivu de nun suponer gastu pal erariu públicu.

Una y bones col preste del Banco de España, el procesu d'absorción tien de ser ratificáu poles Asamblees Xenerales de dambes caxes. Hai que recordar que'l plan de Caxastur nun contempla la fusión de dambes caxes, sinón l'absorción per parte de la entidá asturiana de la caxa manchega, que quedaría como filial anque conservando'l nome y operando como bancu minorista dientro del Banco Liberta, anguaño filial de Caxastur.

Esta absorción ye'l resultáu de que Caja Castilla-La Mancha foi intervenida'l pasáu marzu pol Bancu d'España por cuenta del deterioru financieru de la entidá manchega.