El Sporting algama un valiosu empate

La visita de los asturianos al siempre dificil campu de Riazor tuvo'l premiu d'un puntu pervaliosu tres empatar a ún goles. Un partíu nel que caún de los equipos dominó una de les partes y que vino a confirmar al Sporting como ún de los conxuntos más serios defensivamente, al contrariu que na temporada pasada.

La primer parte foi claramente de los gallegos. Dominaron el xuegu y tuvieren delles ocasiones clares de gol, como un disparu a media vuelta del peligrosísimu Riki qu'acabó pegando'l nel llargueru. Diba ser n'otru balón al llargueru cuando llegó'l gol local, a trés minutos del final de la primer parte. Un remate de cabeza de Juan Rodríguez rebotó nel palu, y nel desconciertu posterior nel área un atentu Lassad remató a la rede. Hasta esi momentu los xixoneses poca cosa fixeron más que defendese de los arreones de los gallegos.
 
El Sporting dominó na segunda mitá

Sicasí, na segunda parte'l partíu diba dar una xiru de 180 graos. El Sporting pasó a dominar el xuegu énte un Depor que pagó físicamente l'esfuerzu de los primeros 45 minutos. El Sporting fíxose dueñu del centru del campu y les bandes, mientres que'l Depor llevaba peligru al contrataque. Pero diben ser los asturianos los que llevaríen el premiu, merecíu, del gol. Un magníficu pase de De las Cuevas al desmarque de Diego Castro diba ser aprovecháu por esti al plantase solu énte'l porteru local, el cual nuna salida mui desafortunada nun foi quién a arrampla-y el balón a Castro, que diba superalo, marcando a placer un gol que ponía'l 1a 1 y que foi mui celebráu polos más de 8.000 sportinguistes que taben nes grades de Riazor.

En definitiva un empate xustu qu'asitia al Sporting sétimu na tabla con 13 puntos y que vien a confirmar el xuegu seriu y trabayáu d'un equipu que nesta temporada, si sigue asina, va da-y munches alegríes a la parroquia sportinguista.

Ficha Técnica

Deportivo de La Coruña 1 - Sporting de Xixón 1

Deportivo de La Coruña: Aranzubia; Manuel Pablo, Colotto, Lopo, Filipe Luis; Juan Rodríguez, Sergio, Antonio Tomás (Adrián; min.75), Guardado; Lassad y Riki (Pablo Alvarez; min.83).

Sporting de Xixón: Juan Pablo; Lora, Botía, Gregory, Canella; Míchel (Matabuena; min.35), Rivera; Luis Morán, De las Cuevas (Carmelo; min.85), Diego Castro; y Barral (Bilic; min.67).

Goles: 1-0, min.42: Lassad. 1-1, min.69: Diego Castro.

Árbitru: Pérez Burrull (cántabru). Sacó tarxetes amarielles a Barral (min.31) y Diego Castro (min.93) del Sporting y a Antonio Tomás (min.31) y Lopo (min.36) del Deportivo.