Caxastur ta acabante de facer una ufierta económica por valor de 400 millones d'euros pa facese col control de Caja Castilla-La Mancha (CCM), que d'esti mou convertiríase nuna filial dependeiente de la entidá asturiana. Esta operación, aprobada pol conseyu d'alministración de la caxa, cuenta col preste del Gobiernu asturianu, de la FSA y de los sindicatos CC.OO y UXT.

Caxastur presentó ante'l Bancu d'España "un proyectu que tien l'oxetivu de ser beneficiosu y positivu pa toles partes y axentes implicaos, tanto n'Asturies como en Castilla La Mancha". Esti nun contempla la fusión de dambes caxes, sinón l'absorción per parte de la entidá asturiana de la caxa manchega, que quedaría como filial anque conservando'l nome y operando como bancu minorista dientro del Banco Liberta, anguaño filial de Caxastur. Esta operación entá tien que ser aprobada pol Bancu d'España, pol Gobiernu castellanu-manchegu y pola propia entidá. Sicasí, la idea de tresformar la caxa d'aforros nun bancu filial puede qu'impida la viabilidá de la operación al xenerar previsiblemente un fuerte rechazu políticu y social nesa rexón.

Hai que recordar que Caja Castilla-La Mancha foi intervenida'l pasáu marzu pol Bancu d'España por cuenta del deterioru financieru de la entidá manchega. Anguaño, aparte de la ufierta de Caxastur, tamién la BBK vasca fixo una propuesta asemeyada a l'asturiana.