El Congresu aprueba la reforma de la Llei d'Estranxería

|

El Plenu del Congresu de los Diputaos aprobó por 185 votos a favor y cuatro astenciones, la remisión al Senáu del proyectu de refomra de la Llei Orgánica 4/2000, de 11 de xineru, sobre Derechos y Llibertaes de los Estranxeros n'España colos votos a la escontra del Grupu Popular y la coalición ERC-IU-ICV y UPyD. El votu favorable procedió de CiU, Coalición Canaria y el PNV, qu'apoyaron al Grupu Socialista na votación.

   La secretaria d'Estáu d'Inmigración y Emigración, Consuelo Rumí, qu'asitió al debate dende la tribuna de convidaos, destacó que'l resultáu ye una "llei moderna, integradora, qu'apuesta pola integración, refuerza la eficacia de la llucha contra la inmigración clandestina y apuesta claramente pol orde, el control y la llegalidá". De la mesma manera, espresó la "satisfaición del Gobiernu pol apoyu que tuvo la llei que punxo de manifiestu la so voluntá de diálogu".

   Amás, anunció que l'Executivu "yá ta trabayando" na ellaboración d'un Reglamentu d'Estranxería acordies coles modificaciones incorporaes na reforma, y aseguró que la normativa ellaboraráse "dende'l diálogu y el consensu". Si bien nun adelantó plazos, señaló que tará aprobáu "lo primero posible", probablemente "enantes d'un añu".

   Demientres l'alderique parlamentariu, el voceru del PP n'Inmigración, Rafael Hernando, anunció que si la so formación llega al poder modificará la llei porque "nun se contó" con ella pa ellaborala, dao que, según dixo, de 63 enmiendes plantegaes, "sólo s'incorporó una". "Ye una refomra cosmética, continuista cola política d'estos últimos cinco años, que tornó la inmigración nel tercer problema de los ciudadanos", aseguró.

   Pela so parte, la negativa d'IU-ICV-ERC a apoyar el proyectu reside en que caltién l'ampliación a 760 díes del plazu máximu d'internamientu previu a la espulsión, nun recueye una refomra del Códigu Civil que permita nacionalizase en menos de diez años a los estranxeros non llatinoamericanos y nun inclúi'l derechu a votu de los ciudadanos non procedentes de la UE nes elecciones municipales. "El problema ye que per parte del Gobiernu, prímase'l discursu duru enantes que la realidá", esplicó'l diputáu d'ICV, Joan Herrera.

Contador Estadistiques