Miles de persones manifestáronse en Carcasón en defensa de la llingua occitana

Miles de persones manifestáronse esti sábadu na población ocitana de Carcasón en defensa de la llingua occitana, falada nesta zona de Francia y tamién nel valle d'Arán, zona de Cataluña llendera con Aragón.
 
La manifestación taba convocada pola plataforma 'Anem Óc', qu'aconceya a entidaes culturales, sociales, sindicales y polítiques comprometíes cola llingua y la cultura tradicionales del Centru y Sur francés. Los organizadores cifraron l'asistencia nunes 25.000 persones.
 
La manifestación convocóse pa exixir al Estáu francés que cumpla coles sos obligaciones internacionales y constitucionales en favor de la proteición de les minoríes llingüístiques y de los sos derechos a la enseñanza y al usu y promoción de pública del so idioma. En concreto, nel comunicáu que llamaba a la movilización, defendíase la presencia del occitanu na enseñanza, nos medios de comunciación y na vida pública, amás de la exixencia d'ayudes a la creación artística nesta fala.
 
La manifestación contó cola presencia de representantes de partios y entidaes culturales de Bretaña, Córcega, Flandes o Cataluña, asina como del grupu parlamentariu nel Parlamentu Européu de Los Verdes/Alianza Llibre Europea.
 
Tamién se dieron cita, ente otres persones, el presidente del Institutu d'Estudios Occitanos, David Grosclaude, l'eurodiputáu y activista pola soberanía alimentaria, José Bové, l'ex-vicepresidente del Parlamentu Européu, Gérard Onesta, asina como'l presidente de la rexón francesa de Midi Pyrénées.