Graciano Torre considera l'aplazamientu del ciclu combináu d'El Musel ye una "situación transitoria pola crisis"

El conseyeru d'Industria y Emplegu del Principáu, Graciano Torre, refirióse güei a la decisión del Conseyu d'Alministración del puertu d'El Musel d'aplazar l'axudicación de la planta de ciclu combináu, entendiendo que ye una "situación transitoria pola crisis". Aseguró, amás, que-y "paez mui razonable que si HC y Endesa --les dos empreses qu'opten a la instalación-- tán negociando p'acordar una inversión conxunta'l puertu-yos dea un marxe pa desarrollar esta negociación".
   Asina indicó qu'en casu de qu'ambes compañíes lleguen a un acuerdu, al suponer una menor inversión "probablemente fuere más fácil y más cortu nel tiempu la construcción de les instalaciones".
   Torre, en declaraciones a Europa Press, indicó que-y causa "sorpresa" que dalguién s'estrañe de la decisión, nuna situación de crisis como la que se ta atravesando, onde hai una baxada del consumu eléctricu y hai dificultaes financieres pa cualquier inversión.
   El titular d'Industria del Principáu manifestó qu'amás esta decisión nun afecta en nada a la construcción de la regasificadora, dao que, según recordó la regasificadora d'Enagás tien previstos unos consumos internos basaos nel consumu domésticu y en cuatro ciclos combinaos, los cuales yá son una realidá.
   "La regasificadora contemplaba nel so casu nel futuru l'ampliación a cuatro tanques", dixo Torre, qu'indicó que l'aplazamientu del ciclu combináu ye "una situación transitoria, productu de la crisis y poro razonable".
   El conseyeru insistió en que'l puertu d'El Musel ye'l "meyor llugar d'España" pa esta instalación y recordó que cola so proximidá a la mar da mayor eficiencia a les instalaciones. "Nun me cabe la menor duda de que nesos terrenos va haber ciclos combinaos", dixo Torre.