IU-BA-Verdes ve responsabilidaes polítiques tres la manipulación del documentu d'impactu de la obra de la Ruta l'Alba

Izquierda Xunida-Bloque Por Asturies-Verdes tien claro que la posible manipulación del documentu d'impactu ambiental de la obra d'asfaltáu na Ruta l'Alba, casu que la propia Viceconseyería de Mediu Ambiente llevó a la Fiscalía, nun foi un error d'un funcionariu, sinón que se debió a "una decisión política, sobre la que nel so momentu va haber qu'analizar responsabildiaes polítiques".
   Asina lo esplicó Francisco Javier García Valledor, diputáu de la colaición na Xunta Xeneral del Principáu, qu'ofreció güei una rueda prensa p'anunciar la exixencia del so grupu a la viceconseyera pa que remita tola documentación sobre esti casu, baxo amenaza d'acudir a los tribunales como acusación popular.
   Izquierda Xunida denunció n'abril que la obra d'asfaltáu del segundu tramu de la ruta entamare sin tenese publicáu nengún estudiu d'impactu ambiental, lo que motivó la paralización de l'actuación. A últimos d'agostu, la coalición conoció que cinco díes dempués d'aquella denuncia, la propia Viceconseyería llevare un estudiu d'impactu ambiental a la Fiscalía pal so investigación por una posible manipulación, con términos y motivaciones se desconocen. El pasáu 7 de setiembre exixeron tola información al respeuto, pero hasta güei nun se-yos remitió.
 
   La coalición pide "en primer llugar, los proyectos d'obra, tanto del primer tramu como del segundu tramu de la senda: en segundu llugar, los estudios d'impactu ambiental del primeru como del segundu tramu; en tercer lugar, les actes de la Comisión Asturiana de Mediu Ambiente (CAMA), de la que la so presidenta ye la propia viceconseyera; y a lo último, los espedientes de contratación del primer tramu y del segundu tramu".
 
   "Como grupu qu'apoya al Gobiernu, pensamos que ye fundamental disponer de tola información pa poder xulgar, y si nun se remite darréu, valoraremos presentamos na causa penal, cuando la Fiscalía tresllade al xuez les dilixencies previes, dao qu'existen nicios de delitos", señaló Valledor. El diputáu da de plazu una selmana a la Viceconseyería pa remitir dicha documentación.
 
Con respeuto a la posible manipulación, Valledor tien claro que "nun tamos ante un problema d'un funcionariu, na manipulación d'espediente, sinón que tamos ante decisiones polítiques sobre les que va haber que valorar nel so momentu les responsabilidaes pertinentes", puntu nel qu'apunta directamente a la viceconseyera de Mediu Ambiente, Belén Fernández".
 
"L'informe ye un informe técnicu, pero la decisión de realizar l'axudicación y subasta pública ye una decisión política. Un tema d'éstos tien que pasar pela CAMA (Comisión Asturiana de Mediu Ambiente), que preside la viceconseyera, poro nun hai posiblidá d'equívocu o error", señaló. "Debería tener presidíu esti asuntu nel conceyu de la Comisón pal segundu tramu. Una de les coses que pidimos precisamente ye la copia de les actes d'estes comisiones", matizó.
 
"Tenemos la sensación", añadió, "de que dende la Viceconseyería de Mediu Ambiente ta actuándose contra natura", recordando que nel procesu del primer tramu sí se publicó dichu estudiu d'impactu. "Alcontrámonos ante un fechu únicu dientro de l'alministración", acabó.